Opinion di un pensionado:
ORANJESTAD (AAN) — Un dama pensionado (AOV), a tuma contacto cu redaccion di DIARIO, relaciona cu e gruponan cu ta protesta riba caya relaciona cu e maltrato cu un cacho a haya door di su doño te cu e mascota aki a muri.
E dama a comenta cu e no tin nada contra esaki pasobra e meneer a haci malo, y ta bon cu comunidad ta mustra cu esaki no ta tolerable na Aruba. Pero e ta desea cu, cu mesun forza cu ciudadanonan di nos pais ta vocifera contra maltrato di cacho, lo surgi un grupo pa vocifera contra abuso di AZV pa cu e pensionadonan. Un grupo cu por saca cara pa e pensionadonan.
E dama aki, tin un problema cu wowo y e drops cu oculista ta receta pa e haya alivio ta sumamente costoso, alomenos pa su persona cu tin un entrada chikito di pensioen di AOV, y e mes tin cu paga! Den botica nan a bise cu nan no por haci nada, pasobra ta hopi remedi AZV no ta paga mas, ni sikiera pa e grandinan cu ta biba di un entrada hopi small.
E señora pensionado a bisa cu e suma cu e ta paga pa AZV ta halto, p’esey e no ta compronde di con AZV no por cubri su remedinan. Fuera di esey e ta viuda y di e entrada di viudez tambe nan ta kita placa pa AZV. Pues e ta paga dos suma pa AZV y esey no ta husto. E ta haci un yamada na hendenan cu tin aprecio pa nos grandinan pa manifesta tambe pa esaki. Un dia cu nan yega edad di pension y hopi di nan lo mester sobrebibi cu ne, lo bay compronde di con mester trece esaki publicamente, cu un manifestacion masal.
Otro aspecto cu el a menciona ta e manera con comercio ta aumentando prijsnan di cuminda y otro articulonan pa cas. Dialuna el a bay haci algun compra y su placa no a yega pasobra e prijsnan a surpasa loke e ta dispone di dje pa su gastonan di sobrevivencia. E persona cu a atende cu ne den e supermercado a bise “awe prijs di tur producto a bolbe subi y nos no por yuda”. Kiermen, pueblo mester asumi tur aumento cu tin, e pensionadonan no ta haya ni un porciento chikito menos, pa honra sikiera tur loke nan a haci den nan tempo laboral activo, pa yuda nos pais crece! Di hendenan na Aruba no ta manifesta contra aumento drastico di costo di bida? E ta afectando tur hogar, y mas tanto nos grandinan cu no tin trabao mas!
