Ministro di Cultura presente na proyecto escolar ‘Fiesta di San Juan’ na Cas Tan Tin

ORANJESTAD (AAN): Den oranan di mainta, Minister Maduro tabata na Cas Tan Tin pa por a presencia e proyecto escolar di Departamento di Cultura “Fiesta di San Juan - Dera Gai,”

na unda nos muchanan ta ricibi informacion tocante nos fiesta tradicional di cosecha riba Dia di San Juan, dia 24 di juni proximo.

   Departamento di Cultura den colaboracion cu Cas Tan Tin y Brandweer Aruba a organiza un programa educativo pa muchanan di Scol Preparatorio y Basico di 1ste te cu 3de klas. Un total di 32 scol y como 3 mil mucha ta haya oportunidad pa experiencia y worde educa riba e Dia di San Juan y e baile di Dera Gai den e periodo di 11 pa 20 di juni.

   Den e sabana di Cas Tan Tin, Minister Maduro di Cultura por a presencia e splicacion di parti di e elenco di Departamento di Cultura lidera pa John Freddy Montoya, cu a duna splicacion di e motibo di e celebracion di Dia di San Juan y a mustra tur elemento di e fiesta cu ta importante pa e muchanan por reconoce den e celebracion. A sigui canto di canticanan popular di tempo di cosecha, demostracion di e baile di San Juan y tambe tabata tin un competencia di e grito di Gay, cu ta eventonan cu ta forma parti di e celebracion di Dia di San Juan.

   Di parti di Brandweer Aruba, Sr. Francis Toussaint a splica e hobennan riba e tradicion di cende candela riba Dia di San Juan y a conseha pa evita di cende candela, ya cu esaki por ta peligroso pa hende, bestia y nos medio ambiente. A duna tips con mester trata si acaso un candela worde cendi pa evita peliger.

   Na final di e evento, Minister Maduro a parti un certificado na cada mucha cu a participa den e demostracion di baile y e wega di grito di gay. Despues tur scol a haya un recorido den e cas monumental Cas Tan Tin  pa asina nan por mira con tabata biba antes na Aruba.

   Minister Maduro di Cultura ta gradici tur instancia cu a haci e eventonan aki posibel, Departamento di Cultura, Museo Cas Tan Tin, Departamento di Bombero, e agrupacion musical y tambe e grupo di hoben di Formacion Social, kendenan a yuda coordina y guia e muchanan durante nan yegada cu bus, e presentacion escolar, e recorido den Museo Cas Tan Tin y salida cu bus back pa nan respectivo scolnan. Masha danki. Cultura bo tin cu bib'e y cu bo participacion bo ta engrandec'e.