Cu evento na Centro di Bario Playa Pabao
ORANJESTAD (AAN): Den conmemoracion di Dia Mundial di Refugiado, Agencia UNHCR (di Nacionnan Uni pa refugiadonan), hunto cu CEDE Aruba, HIAS Aruba, VeneAruba Solidarioa, IOM, y PADF lo ta organizando un Feria Multicultural awe Diasabra 22 di Juni, for di 4:00 pm te cu 7:00 pm na Centro di Bario Playa Pabao.
E evento ta habri y gratis pa tur hende di Aruba. Designa pa Nacionnan Uni, e Dia Mundial di Refugiado ta celebra e forza y corahe di personanan cu a haya nan mes obliga di huy di nan cas debi na conflicto of persecusionnan. E aña aki, e atencion ta centralizando riba solidaridad cu e refugiadonan, pa un mundo den cual e refugiadonan ta bon bini.
Na e Feria Multicultural, e participantenan lo por embarca riba un viahe rond mundo via di diferente cultura y sabor presenta na standnan cu lo representa Venezuela, Colombia, Ecuador, Peru, Republica Dominicana, Haiti, Mexico, India, Filipinas, y Aruba.
Lo bay tin tambe bailenan cultural, musica, y actividadnan pa muchanan, manera Dino Jump y pintamento di cara. E rapport di UNHCR 2023 Global Trends, ta subraya e importancia di solidaridad y solucionnan pa refugiadonan. Na 2023, e cantidad di hendenan cu a wordo forza pa huy, a yega 117,3 miyon debi na persecusion, conflictonan, violencia, y violacionnan di derechonan humano. Esaki ta igual cu 1 di cada 69 persona rond mundo.
Aruba ta anfitrion di un porcentahe hopi halto di hendenan refugiado, compara cu su poblacion, cu aproximadamente 17.000 refugiado y migrante di Venezuela. Na Aruba, UNHCR, CEDE Aruba, HIAS, VeneAruba Solidaria, IOM, y PADF ta colabora estrechamente cu gobierno y sociedad civil pa proteha y ofrece solucionnan duradero na e refugiadonan. Ora bo duna nan un chens, refugiadonan por contribui activamente na comunidadnan cu a ricibi nan cu man habri, sea via trabao, educacion, deporte, of otro actividadnan.
Buscamento di refugio no ta un escogencia, hopi biaha e ta unico caminda pa sobrevivi, pa haya paz, y realiza nan soñonan. Awor mas cu nunca, refugiadonan ta depende riba nos solidaridad.
