Minister Plenipotenciario mr. Ady Thijsen
ORANJESTAD (AAN)/Den Haag: Mirando cu Hulanda proximamente lo tin un Gobierno nobo y cu tambe lo tin un Secretario di Estado nobo pa Relacionnan den Reino, Minister Plenipotenciario mr. Ady Thijsen a duna comentario riba e desaroyo aki na final di reunion di Conseho di Minister di Reino (RMR). Den esaki e mandatario a bisa cu indicacion ta mustra cu e Secretario di Estado nobo lo kier continua cu loke nan a haci caba den pasado.
‘Esey ta mustra bon. Cada candidato tin nan experencia. Nos lo mester duna nan chens pa goberna. Aruba ta traha cu tur partido cu tin. Nos sa cu nos ta haciendo un bon trabao y nos sa unda nos ta para,’ segun Minister Thijsen.
Riba pregunta di prensa tocante e punto di bista di PVV pa loke ta e parti Caribense di Reino, Minister Thijsen a bisa cu en berdad cierto comentarionan skerpi a wordo haci den pasado y mester lag'e te ey. ‘Nos mester sali di e punto di bista cu nos ta den un otro desaroyo y bo mester respeta e democracia; e resultado di eleccion na Hulanda. Ami ta di 2005 y mi a experencia diferente politiconan Hulandes, tambe di PVV. No ta awor nan a cuminsa, pero tin hopi aña den politica Hulandes. Nan ta hopi skerpi, pero e “bottom line” di nan ta esaki.
Nan ta bisa bo cu nan no kier pa e paisnan den Reino bin bati na porta cada biaha pa placa y nan no kier pa e paisnan ta keda sin tuma nan responsabilidad. Ami por papia pa Aruba, cu ta un pais cu semper a carga su responsabilidad; Aruba ta un pais cu si mester, semper a fia placa riba mercado financiero internacional. E unico momento cu Aruba a fia placa di Hulanda, ta durante di e pandemia pa nos por a sobrevivi. Ami ta kere cu nos mester mira padilanti y mi te kere den e palabranan cu e Hulandesnan mes ta usa hopi cu ta continuidad. Y manera Secretario di Estado Van Huffelen a bisa cu e ta sali for di punto di bista cu tin continuidad di loke nos a bin ta haci,’ tabata palabranan di Minister Thijsen.
Finalmente Minister Thijsen ta kere cu ta bon pa tin hende cu hopi experencia den funcionnan clave, pasobra awor esaki ta necesario. Segun sr. Thijsen casi tur Minister y Secretario di Estadonan ta nobo y e tin un bentaha cu nos tin e experencia pa nos por sigi fortifica nos paisnan den Reino. Tambe Minister Thijsen a mustra riba e posibel cambionan cu ta bai bin den Reino, cu eleccion atrobe na Sint Maarten den luna di Augustus, Curaçao ta bai vota na Maart 2025 y Aruba tin eleccion na Juni 2025.
E potret ta cortesia di Arubahuis
