Ministro a bay check varios tereno pa construi viviendanan na forma inovativo

ORANJESTAD (AAN): Siman pasa Minister di Vivienda, Infrastructura y Telecomunicacion,

sr. Rene Herde a haci un recorido rond Aruba pa bishita diferente tereno cu ta apto pa varios proyecto innovativo di Vivienda.

   Den cuadro di Plan Nacional di Infrastructura (PNI), Minister Herde a haci dicho recorido  den compania di varios experto local riba tereno di Infrastructura, hunto cu arkitecto di paisahe renombra Hulandes Paul van Beek y Charles Vermaas cu ta un diseñador di ciudad y paisahe.

   Paul van Beek ta un experto riba tereno di traha barionan (woonwijken) na Hulanda. Van Beek y Vermaas ta di bishita na Aruba pa comparti nan conocemento y experticio cu Minister Herde y e team di expertonan di Infrastructura local.

   Un di e retonan di mas grandi cu Aruba ta enfrenta actualmente ta esun di vivienda. Tin diferente factor cu a conduci na e problematica aki.

   Varios departamentonan a worde neglisha pa basta tempo, incluyendo e departamentonan encarga cu Infrastructura DLV, DIP y DOW.

   E mal maneho di e departamentonan tin como consecuencia cu e tramitenan pa haya tereno y financiamento na final ta ocasiona un obstaculo pa logra traha un cas.

   Antes na Aruba nan tabata otorga tereno basta grandi, cu consecuencia cu awo tin scarcedad di espacio pa construi vivienda.

   Durante e recorido a bishita e tereno na Port City (Aruba Ports Authority), despues a bay Colony y pa finalisa a bishita un tereno na Burunbundo. E terenonan aki tin un potencial enorme pa por bin cu ideanan revolucionario riba tereno di infrastructura y amplia e vision encuanto trahamento di vivienda na Aruba e.o. traha barionan na luga di casnan individual, traha vivienda den edificionan vertical y no solamente horizontal.

   Pa facilita e proceso di haya tereno, financiamento, traha cas etc. mester cuminsa na diferencia e situacion y necesidad di cada persona individualmente. Un famia cu ta consisti di mama, tata y 2 yiu su vivienda no por ta mesun tamaño cu un persona di edad avansa cu ta biba su so. 

   E meta ta pa trece un solucion na e problematica di vivienda y yuda pueblo di Aruba, no obstante nan entrada financiero, pa por alcansa e soño di por tin nan mesun hogar.