Segun Diego de Cuba:
ORANJESTAD (AAN) Diego de Cuba, Presidente di Sindicato STA, ta sigui cuestiona e salario cu e director nobo di Triple A ta bay gana, cual ta surpasa e salarionan di tur Director di compania di Gobierno hunto.
De Cuba ta considera esaki un abuso di marca mayor. “Laga nos ta sincero cu Dios y cu nos mes. Di unda mayoria di nos turistanan ta bin? Di Merca! Actualmente nos tin e persona di James Fazio, kende a bin haya e desaster cu Peter Steinmetz a laga atras. Nos cu nos, no tin hende den top funcionnan na Aeropuerto, cu den concepto di Sindicato ta cu nan mester a bay cas basta tempo caba, pero e link eynan dificilmente por wordo kibra, pasobra nan ta mara manera un cadena na otro, y no por kibra nan sin mas, y aworaki bo ta bay haya bo cu un director nobo. Corda bon, nos a pasa den varios director di Schiphol Groep, y mi tin cu bisa ‘lamentablemente, nan a laga mas tristeza atras, cu alegria”, de Cuba a expresa.
De Cuba a subraya cu e no ta compronde e ponencia, cu tur respeta pa Minister Wendrick Cicilia y di con un decision asina aki. “Pasobra si mi tabata minister, mi ta kere lo mi a pusha pa Schiphol Groep pone un yiu di tera eynan na cabes”, Diego de Cuba a remarca.
