ORANJESTAD (AAN): Cada aña riba 25 di november, Aruba ta uni cu miyonnan di hende mundialmente pa celebra Dia Internacional pa Eliminacion di Violencia Contra Hende Muhe.
Cu esaki, ta cuminsa tambe e 16 Dianan di Activismo—un campaña global cu ta dura te cu 10 di december, Dia Internacional di Derecho Humano. Durante e periodo aki, Aruba tambe ta uni na e movemento internacional “Orange the World”, uzando color oranje como simbolo di speransa, union y un futuro sin violencia.
En general, Aruba ta un comunidad trankil, sinembargo hopi hende muhe y mucha muhe ta enfrenta various forma di violencia: abuso domestico, abuso emocional y digital, y control economico. E avance tecnologico a trece peligernan nobo manera bullying, menasa online, difamacion digital y abuso di imagen.
E desafionan aki ta enfatisa e necesidad urgente pa mas conscientisacion, prevencion y proteccion pa combati tur forma di violencia cu hende muhe y mucha muhe ta experimenta diariamente.
Cada campaña contra violencia di hende muhe y mucha muhe, ta pone enfasis riba e responsabilidad di henter nos comunidad. E lucha contra violencia ta un tarea di nos tur: scolanan mester forma hobennan cu balor pa respet, hefenan di trabou mester crea un ambiente laboral sigur, Polis y profesionalnan social mester sigui ricibi formacion especialisa, mayornan mester ta mas consciente di ta bon ehempel pa nan yiunan den e trato cu nan ta brinda otro den cas, y famianan, mester sinti suficiente apoyo pa sali for di silencio.
Durante e 16 Dia di Activismo, varios compania y entidadnan gubernamental ta mustra nan apoyo door di ilumina nan edificio na oranje, recordando nos comunidad cu violencia contra hende muhe no ta un asunto priva, sino un problema social cu ta exigi atencion di inmediato.
Ban nos tur reafirma nos compromiso pa crea un isla unda tur hende muhe y mucha muhe por biba sin miedo y cu dignidad. Hunto, nos ta pinta Aruba oranje riba e dia aki, como conscientisacion pa un futuro sin violencia.
