Minister Rene Herde tin di corda cu Ponton y su barionan tambe ta di Aruba

ORANJESTAD (AAN) Dos luna pasa Matutino DIARIO a haya oportunidad di tin un combersacion informal cu Minister Rene Herde,

tocante e situacion deplorable di stof den e bario paden di e entrada banda di ex-Wema, y tambe di falta di facilidad pa warda bus, ya cu no tin ni un bushalte entre e rotonde Ponton di WVB Boulevard  y e rotonde di Tanki Flip.

   E mandatario a haci manera el a tuma na serio e situacion, pero mescos cu a sosode cu gobierno anterior, nan no a tene cuenta cu ne, siendo cu pa mas cu 10 aña peticionnan a wordo haci na DOW, DIP, y e ministernan concerni, pa yuda e habitantenan cu asfalt riba e parti di caminda di tera, pasobra hopi bisiña ta sufriendo di e consecuencianan y e cantidad di stof cu ta “baña” nan cas dia aden, dia afo, y ta drenta pega den e murayanan di paden tambe. Mayoria bez mester ta porta cera, y aworaki cu e calor horibel cu ta haci, nan mester laga drenta brisa na cas, pero ta dificil.

   Unico cos cu cada 2 pa 3 luna ta sosode ta cu ta bin trucknan di DOW basha awa riba e tera, pero apenas esaki ta seca full e cantidad di stof ta bira pio.

   Encuanto bushaltenan, manera ta mustra den potret hunto cu e articulo aki, tin un banki di palo cu e doño di e car wash a laga traha pa e pasaheronan cu ta warda bus bao e palo di kwihi unda den pasado tabata tin un parada di bus cu su borchi (nada mas), pero di un dia pa otro esaki a wordo kita y tin mas cu seis aña cu no a bolbe pon’e. Manera por observa autonan di un compania di turismo ta wordo staciona net dilanti e banki, y nan ta tapa completamente e bista pa wak ora e bus di Ponton ta biniendo for di e rotonde di Tanki Flip. Pues simplemente no por sinta riba e banki, no por haci uso di dje.

   Tin mas problema riba e caminda entre e borchi grandi di ex-Wema pa bay, por ehemplo, te EPB Hato, y hopi studiante ta cana of core riba bicicleta na peligro pasobra no tin acera, ni un centimeter di caminda pa cana, y e autonan ta core masha duro eynan. Minister Herde a bisa cu e siman siguiente (mas cu dos luna caba) e lo laga hende di DOW wak e situacion, pero te dia di awe ni un auto di DOW ningun hende a mira ta yega wak, mucho menos puntra e habitantenan. Pues un smak na decepcion ta loke a keda for di e combersacion ey cu e mandatario. Por bisa hasta “tur ta mescos”!

(Skirbi pa Mercedes Abdul)