Francis Saladin di Comerciantenan Uni Aruba (CUA):
ORANJESTAD (AAN): Segun señor Francis Saladin di Comerciantenan Uni Aruba (CUA), e organisacion ta actualmente acumulando y analisando informacion tocante e Consensus Rijkswet HOFA. CUA ta aprecia cu diferente partidonan político ta habri dialogo y ta sinta cu nan pa comparti e informacion relevante. Resientemente, Fraccion di MEP den Parlamento a tene nan di dos encuentro importante cu gremionan sindical y comercial, den cua CUA tambe a participa, pa duna mas claridad riba e contenido di Consensus Rijkswet HOFA.
Señor Saladin a indica cu te ainda CUA no a forma un posicion oficial tocante e tema, pasobra nan ta sigui evalua e informacionnan cu ta bin for di varios stakeholder cu ta involucra den e proseso.
Segun Saladin, den un proceso di consensus rijkswet, Gobierno di Aruba tin un obligacion pa educa pueblo y stakeholdernan riba contenido di HOFA. “Ora bo ta papia di un consensus rijkswet, bo mester busca consensus di pueblo tambe. Prome cu por tuma un decision, mester comparti hopi informacion pa tur hende por comprende e tema, y e ora ey nos por forma nos opinion riba kico Gobierno mester haci den representacion di Aruba,” señor Francis Saladin a declara.
