Minister Endy Croes a ricibi cinta teal di Fundacion Alzheimer Aruba

ORANJESTAD (AAN): Diaranson, Minister di Enseñansa y Deporte, Endy Croes a ricibi e cinta color “teal” en conexion cu e siman di conscientisacion y reflexion di Alzheimer.

Pa 10 aña caba, mundo ta bin hunto den e campaña di conscientisacion di Alzheimer.

Alzheimer ta un malesa cu ta bin cu hopi reto pa hopi ciudadano di nos pais y nan famia. P’esey ta importante pa no sconde e malesa aki pa publico pa asina cada ciudadano por ta consciente di e retonan cu e malesa aki ta trece cu ne.

Durante luna di Concientisacion di Alzheimer, Minister Croes ta encurasha cada ciudadano pa siña mas di e condicion aki y uni na e campaña mundial di conscientisacion.

"Mi ta gradici y felicita Fundacion Alzheimer Aruba pa e excelente trabou cu nan ta haci pa nos comunidad pa yuda trece conscientisacion y yuda esnan cu Alzheimer y nan famia”, Minister Endy Croes a expresa.

Minister Croes a gradici Melva Croes -Yanez, Vice Presidente y Jenny Montiel, Nutricionista y Fundacion Alzheimer Aruba pa e honor ricibi.