ORANJESTAD (AAN): Minister Ursell Arends, encarga cu e carteranan di Integridad, Naturalesa, Transporte y Asuntonan di Adulto Mayor a expresa ora di asumi su posicion cu e "emocion ta grandi y nos a traha duro pa yega akinan y e ta honor pa por representa Aruba como Minister.
Danki na cada persona cu a kere den nos y a sostene nos pa yega akinan, cada persona por ta sigur cu lo bay traha duro na beneficio di Aruba".
El a laga sa cu den su carera profesional el a haya hopi hende cu a sostene y kere den dje y esey tambe a crea e fundeshi pa loke e ta awe como politico y awo como minister di Aruba.
Segun Arends, tur hende por ta sigur cu lo bay traha duro na beneficio di Aruba pa asina aki saca Aruba pa dilanti y haci tur hende cu a sostene nan orguyoso di por a sostene nan plataforma y e como persona.
El a remarca cu integridad ta un tema hopi importante pa comunidad y sigur pa gabinete Wever Croes II. Naturalesa ta algo cu ta preocupante pa e ciudadanonan y lo bay duna atencion debido pa asina trata e tema aki di un forma integral caminda cu lo contribui cu tur e stakeholdernan pa duna esaki contenido.
Fuera di esaki tin e responsabilidad pa organisa e asunto di e adultonan mayor den un forma integral y lo bay traha cu e adultonan mayor y cu e instancianan di cuido pa asina crea e maneho y plannan concreto pa duna e adultonan mayor e atencion necesario.
Esaki ta e cosnan cu tin den plan pa traha riba nan y pueblo por ta sigur cu ora cu cuminsa desplega e trabao cu a planea esaki pa hopi tempo caba y cu ta cla pa traha na bienestar di Aruba en general, e mandatario a expresa.
