Den un mundo di recuperacion y construccion di un futuro nobo - *Rapport mester wordo traha di e placa cu corupcion a costa - *Argumentonan moral aparentemente no tin peso ni balor mas
ORANJESTAD(AAN)—Na varios ocasion DIARIO a trece dilanti cu mester atende cu un forma mas severo cu corupcion.
Hasta prome cu corupcion bira algo, cu aparentemente ya no ta un asunto di berguensa, DIARIO a indica cu mester adapta leynan cu ta atende cu corupcion pa e resultadonan serio cu nan tin pa un pais.
Mester cuminsa defini tambe na un forma mas exacto kico ta corupcion den mundo moderno cu ta conta cu tecnicanan cu a bira un ayudo pa corupcion y pa ladronicia abierto di fondonan publico.
Un persona cu tin su propio negoshi, ta cuida su negoshi. Un persona cu henter su bida a dedica na costruccion y mantencion di su empresa, cu tur razon ta evita cu e ta wordo perhudica dor di accionnan inaceptabel cu ta afecta resultadonan di su empresa.
Corupcion realmente ta ladronia. Punto. Corupcion ta nifica cu regla ta wordo viola pa hende haya loke nan no tin derecho di haya of hende cu ta haya placa bou di mesa, acumula rikesa pa cual nan no a traha.
Lamentablemente e concepto cu hende tin di un comunidad, un aparato gubernamental, a cambia mescos cu e concepto di decencia y indecencia, pues e concepto moral.
Antes si yama un hende “ladron”, boca di e persona cu a expresa e palabra lo mester a haya atencion di dokter si a resta algo di su boca.
Awe e palabra “ladron” aparentemente ta causa bofon y risa t hasta den cierto caso ta haci hende pensa cu ladronicia, acto di corupcion sabi, ta un logro.
Ta esaki ta haci cu e esfuerzonan cu ta wordo haci pa gara corupto, mester haya tur sosten mas ainda si nota con ciudadanonan den problema social no por haya sosten of derecho comunitario pasobra ladron a deshaci di nan derecho.
Nos leynan mester cera porta pa corupcion na forma eficaz den cual por nota cu corupcion como un midi pa e haltura di nos balornan y moral, ta parce di ta aceptabel.
Na e momentonan aki nos mundo, nos comunidad, ta pasa den situacionnan sumamente dificil.
Mester reconstrui un mundo cu exigencianan moderno pa asina por ta eficiente. E resultadonan di pandemia ta uni na inversionnan cu mester a wordo haci pa motibo di progreso cientifico.
Mescos cu a pasa despues di Segundo Guera Mundial, e reconstruccion di comunidad na tur nivel, mester wordo adapta na un futuro cu ta nifica cu mester di placa pa e pais, e comunidad como totalidad, por habri su caminda pa e futuro aki.
Un pais awe mester ta capaz pa inverti den su hobennan y den nan futuro cu ta exigi educacion y tur gastonan envolvi.
Cada cent cu e pais perde pa motibo di corupcion, ta stroba un hende cu hamber pa come y un mucha cu mester traha pa Aruba den su futuro, pa haya e educacion necesario.
Si moral a cambia y hende cu comete corupcion ta bira heroe of figura nacional y asina e control moral bira menos, mester cambia nos leynan pa e hendenan aki debolbe comunidad su placa cu nan a horta pa medio di corupcion.
Castigonan pa corupcion mester wordo studia y leynan adapta na un realidad, cu ta mustra cu prison por bira hasta urna electoral caminda e candidato mes ta presente pa vota mientras pafor di comunidad, su partido ta bati man pa e hecho cu el a haya hopi voto durante su estadia den prison.
