Luna di mei 2024 ta otro luna record pa turismo di Aruba

Minister Dangui Oduber: Tendencia di crecemento di turismo ta continua

ORANJESTAD (AAN): Minister di Turismo y Salud Publico sr. Dangui Oduber ta informa comunidad cu e resultadonan di turismo pa e prome 5 lunanan di aña 2024 a drenta. A caba di ricibi e resultadonan di luna di mei 2024 y por nota cu e tendencia di crecemento y demanda grandi pa Aruba ta continua.

            A ser demostra cu analisis cu e demanda pa Aruba ta keda un di esunan mas halto den henter Caribe. E indicadornan cu ta midi e exito di turismo ta confirma esaki.

            Minister Oduber ta satisfecho con luna di mei 2024 a sera cu resultadonan positivo. Mei 2024 a ricibi 111.180 bishitante cu a drenta Aruba cu ta un 16.6% den crecemento. E prome 5 lunanan di aña 2024 (Jan-Mei 2024) Aruba a registra un crecemento di 18.7% vs e prome 5 lunanan di aña 2023 cu porcierto tawata e miho aña den historia di turismo pa pais Aruba.

            Nos mercado principal cu ta e mercado americano a registra un crecemento di 17% e prome 5 lunanan di aña 2024 vs 2023 cu ta un crecemento impresionante.

            Turistanan ta keda satisfecho cu Aruba y ta clasifica e “Guest Experience” cu un 9.0. E categoria cu a wordo clasifica mas halto, ta: ambiente cu 9.4.

Loke ta mas remarcabel ta e hecho cu turistanan ta gastando mas placa y lagando mas placa atras den nos economia.

            Durante e prome kwartaal di aña 2024 turistanan a gasta un averahe di $666 pa cada turista. E gasto aki ta wordo midi for di nan credit card di Visa. Esaki a suma un total di gastonan regista di usuarionan di visa credit aki na Aruba di $185.095.875.

            Ta pa remarca cu e prome kwartaal di 2024 ta uno hopi positivo pa Aruba.

            Loke tambe ta importante pa menciona ta e hecho cu durante e prome 5 lunanan di aña 2024, un 31% di turistanan stayover a hospeda na un vacation rental. Aki minister Oduber a subraya e importancia pa regula e sector aki mas pronto cu ta posibel y ta contento cu e legislacion ta na Raad van Advies actualmente.

            Pa conclui, Minister Oduber ta satisfecho cu Aruba ta keda un destinacion precioso cu demanda halto pa hopi bishitante den Caribe. Resultadonan ta demostra cu keto bai tin cifranan halto pa confirma e bon maneho. 

            Minister Oduber kier a gradici tur partnernan di turismo pa e resultadonan positivonan aki. E ta confirma cu e maneho cu ta ser hiba ta uno efectivo, treciendo e turista afluente cu ta contribui na e spin off economico di turismo. Danki na cada un persona laborando den e sector turistico, ban sigui demostra nos cordialidad y duna e hospitalidad na nos bishitantenan cu nos ta conoci pe.