Presidente di Asociacion di Fisioterapista Mimi Ponson:
- Mas di 20 aña tin mesun cantidad di fisioterapista
- “Nos ta den un situacion di man mara”
ORANJESTAD (AAN) Mimi Ponson, Presidente di e Asociacion di Fisioterapista, a reacciona riba cierto articulonan cu a sali den prensa e ultimo dianan.
El a splica kico ta pasando cu e servicionan cu enberdad tin hopi keho, pero tin poco hende pa traha. Ponson a bisa cu e problema aki no ta di awo ni di aña pasa, pero tin varios aña caba cu esaki ta andando, y toch e Asociacion kier splica pueblo kico ta pasando pa nan compronde con e fisioterapistanan ta traha y con e cos ta bay.
“Pasobra nos ta eigenlijk den un situacion unda nos ta un poco man mara. Nos ta actualmente 26 fisioterapista y nos tin mas cu 20 aña cu e mesun 26 fisioterapistanan. Bo ta compronde: poblacion a crece, tin vergrijzing, y no so esey, mester tene cuenta cu nos ta luchando un poco cu obesidad, anto e demanda di pashent a bira hopi mas pa nos y nos no a aumenta den cantidad, y nos ta luchando cu esey”, ta loke Mimi Ponson a señala.
El a agrega cu ta lamentable pasobra poco dia pasa a sali den prensa, cu aparentemente e fisioterapistanan a cambia nan manera di maneha e lista di spera y tuma pashent nobo.
“Mi ta bisa cu e no ta berdad; na ningun momento nos a cambia nos manera di trata hende ni di wak pashent, ni di wak pashent, pone nan riba lista di spera. Kico ta pasando ta cu ora un pashent yama, door cu nos lista ta un poco largo nos ta purba splica e pashent cu e lista di spera ta di ocho pa nuebe siman, cu pa nos ta un poco incorecto pone un pashent riba lista di spera sabiendo cu e tin dolor y cu e kier wordo yuda mas lihe posible. Y di nos banda nos ta splica e pashent cu ta na dje si e kier pone e nomber cerca nos, si e kier warda ocho of nuebe siman of si e kier yama un colega di nos pa wak si eynan e por haya un lugar mas lihe”, Mimi Ponson a indica.
El a sigui bisa cu, aparentemente, a bay un tiki fout eynan pasobra den e articulo tambe ta bisa cu nan no kier tuma pashentnan mas riba lista di spera. “E no ta asina tampoco, e ta hopi yammer pasobra mi ta sinti cu nos ta haciendo nos best, ta purbando di maneha e situacion miho cu ta posible y nos ta un poco man mara”, Mimi Ponson a remarca. Ta trata aki di pashentnan asegura di AZV y di pashentnan priva. Pero mayoria ta di AZV, Ponson a menciona.
