KYPA ta organizando un evento ‘Cinco de Mayo’ cu meta caritativo

Raynedrick Koolman, PR:

ORANJESTAD (AAN) – Den un conferencia di prensa convoca na Bochincha Container Yard, e Relacionista Publico di KYPA (Kiwanis Young Professionals Aruba), Raynedrick Koolman, a trece dilanti informacion, tocante un evento di fiesta di gala ‘Cinco de Mayo’ cu nan ta organizando pa dia 5 di Mei venidero, pa recauda fondo pa duna bek na comunidad.

  Raynedrick a bisa cu KYPA ta un grupo di hoben entre 25 cu 45 aña, cu ta organiza eventonan caritativo. Nan ta entre 30 pa 40 miembro, y ta zorg pa organiza proyectonan ta duna bek na comunidad, pero muy specialmente na e muchanan.

   Pero logicamente, pa tur proyecto cu nan ta desaroya, mester recauda fondo. Pesey, nan a bin na e idea pa organiza un evento cu lo tuma lugar dia 5 di mei, na Bochincha. E ta cuminza pa 9’or di anochi te 2 or di mainta, y e animacion musical ta den man di tres grupo hopi popular aworaki y un DJ.

E suma cu lo recauda ta bay wordo uza pa caridad.