Casnan di nos grandinan contento cu ayudo di Aruba Lions Club.

ORANJESTAD (AAN): Sirbiendo comunidad pa mas cu 75 aña na Aruba, un biaha mas weekend pasa,

Aruba Lions Club a sali pa sigui cu su proyecto di "Smile Mobile" y a bishita e biaha aki Sint Michael Paviljoen y tambe San Pedro di Verona na playa cu ta e centro di cuido pa nos grandinan na nos hospital bieu.

   Ariba e diasabra aki tambe a instala un miembro mas di Aruba Leo Club cu ta Catherine Wernet cu pa algun tempo tabata mustrando su interes, pa forma parti di e muchanan cu ta haci trabaonan voluntario pa comunidad.

   Un Pabien na e Leo Club y nan leadernan cu un miembro mas. A sigui mes ora cu e trabaonan di e dentadura di nos grandinan cu a haya un bon limpiesa y otronan cu mester a drecha y asina e dia a pasa y mientras esaki a tuma lugar e grandinan a worde entreteni paden cu e musica di e leonnan y tambe cu e muchanan di Leo Club cu a percura pa e grandinan ricibi algo di smaak.

   Cu e cooperacion di Bright Bakery, Universal Technologies Aruba, PriceSmart, Friends of Lions cu a percura pa e algo di smaak, hunto cu tur e miembronan di Aruba Lions Club y Leo Club, a haci sigur e proyecto aki exitoso un biaha mas y tambe esnan responsabel pa esaki Lion Igor Croes y Lion Magaly Franken cu nan bon trabao formando parti di e comishon di "Smile Mobile".

  Pronto Aruba Lions Club lo lansa e proyecto aki pa tur esnan den comunidad cu berdaderamente mester di esaki, por ricibi e servicio di nan dentadura y tambe otro typo di controlnan medico cu lo por bay worde duna den un proyecto di Aruba Lions Club.

Keda pendiente y Aruba Lions Club lo anuncia esaki pronto pa asina contribui un biaha mas na comunidad.