Minister Geoffrey Wever
ORANJESTAD (AAN): Den cuadro di e Programa di Gobernacion AVP-Futuro 2025-2028, unda cu a keda acorda cu entre otro lo stimula participacion mas amplio di comunidad den economia y tambe pa stimula actividad economico ‘pariba di brug’, e fin di siman aki lo tin varios actividad pariba di brug.
Diasabra lo tin e San Nicolas Pop-up Market unda mas cu 16 empresarionan local lo ofrece arte, artesania local, cuminda y bebida pa publico. Lo bay tin un dino-jump pa e muchanan por goza durante e actividad. E Pop-up Market lo ta di 9'or di mainta pa 3'or di atardi riba Plaza Lolita na San Nicolas.
Den mesun fin di siman riba diadomingo Fundacion Savaneta Prome Capital hunto cu Ministerio di Economia y Sector Primario ta organisa e prome Savaneta Seafood Festival. E Savaneta Seafood Festival lo conta cu benta di cuminda di lama fresco, torneo di pesca y entretenimento musical. E festival lo brinda un plataforma pa productornan local ofrece nan productonan y conoce innovacion culinario, mientras cu ta reforsa e identidad autentico di Aruba.
Minister Geoffrey Wever ta invita Aruba henter pa bin bishita e dos eventonan aki cu lo tuma lugar e fin di siman aki pariba di brug y duna sosten y apoyo na iniciativanan unico cu gran potencial pa bira algo grandi pa nos hendenan y nos bishitantenan.
