Inversion y oportunidad ta  habri caminda pa futuro na 2022

Prome Minister Wever-Croes ta anuncia accion central pa Aruba na 2022 ---  *Inversion den tur sentido di henter comunidad ta yabi pa Aruba nobo --- *E lider nacional ta expone plan pa oportunidad y bienestar  di tur hende

ORANJESTAD(AAN)-- Den su edicion di awe, DIARIO lo bay duna atencion na e forma cu Aruba mester sigui dilanti den e situacion mundial y nacional.

Futuro di e pais ta depende di gobernacion.

E plannan di Gabinete Evelyn Wever-Croes, a wordo presenta ayera.

Diamars 4 di januari 2022, Prome Minister Evelyn Wever-Croes den nomber di Gobierno di Aruba, a anuncia decision di Conseho di Minister pa decreta e aña aki, aña 2022, como aña di Inversion y Oportunidad.

Den su presentacion di 2022 como aña di Inversion y Oportunidad, Prome Ministro Evelyn Wever-Croes ta expone e contenido di plannan gubernamental den e siguiente texto.

“Desde Covid 19 a haci su entrada na Aruba na maart 2020, nos pais a sufri un sla hopi duro. No solamente Aruba a sinti e sla aki pero mundo henter a wordo sacudi pa e pandemia aki, haciendo e efecto mas devastador ainda pa un isla cu su pilar economico ta turismo.

Aña 2021, tawata un aña cu hopi reto pero cu determinacion y trabou duro, a cuminsa cu e trayecto importante di recuperacion. Cu esfuerso di cada ciudadano, ta logrando e recuperacion cu tawata kier a logra den e situacion cu nos tawata prome cu e pandemia.

Aña 2022, no solamente nos kier logra recupera y yega bek manera nos tawata ta prome cu e pandemia, sino nos kier ta miho cu prome cu e pandemia. Aña 2022, lo ta un aña na unda inversion lo trece oportunidadnan nobo pa nos tur.

Desde Gabinete Wever-Croes 1, cada aña a wordo decreta cu un tema.

- 2018 Aña di Papiamento

- 2019 Aña di Famia y Cuido di nos Muchanan

- 2020 Aña di Innovacion y Enseñansa

- 2021 Aña di Recuperacion

E vision di Gabinete Wever-Croes II pa aña 2022, Aña di Inversion y Oportunidad, ta pa crea Inversion den sentido amplio. Inversion den bo mes; Inversion den nos economia y Inversion den nos pais creando Oportunidad pa tur ciudadano di nos pais.  

“Cu cada Inversion nos ta bay crea oportunidadnan nobo y cu e oportunidadnan nobo cu surgi, ta crea mas inversion cu ta crea mas oportunidad y diversidad den inversion. Pues cu un interpretacion amplio di Inversion y Oportunidad, den nos economia, finansas, medio ambiente, agricultura, den e ser humano, den salud, salud mental, den enseñansa.

Pero pa nos logra e meta aki, e Aña di Inversion y Oportunidad, Aruba mester di nos tur. Na e momento aki, Aruba ta conta riba cada un di nos pa duna di nos parti cu optimismo, positivismo y determinación pa nos logra e metanan cu nos propone y asina logra hiba nos país padilanti”, Prome Minister Evelyn Wever-Croes a enfatisa.”

Te asina leu e presentacion di Prome Ministro Wever-Croes.