Na December DIARIO a adverti pa situacion explosivo na Januari --- *Prestamo y asistencia Hulandes a percura pa bida social continua --- *Companianan di utilidad prepara den situacion di emergencia actual
ORANJESTAD(AAN)—For di momento cu Omicron a haci su entrada na momento cu mundo tabata biba cu e resultadonan di Delta, DIARIO a adverti pa culminacion di un situacion serio na Januari 2022.
A base di informacion di expertonan internacional y local, DIARIO a prepara Aruba y a prepara tambe pa por informa Aruba debidamente den un situacion cu segun expertonan ta mas serio cu e situacion cu a presenta na 2029 y 2021.
Pa por a prepara informacion corecto pa Aruba na momento cu e situacion di emergencia na Aruba presenta su mes, DIARIO mester a colecta informacionnan importante manera na prome lugar e resistencia riba tur tereno cu Aruba lo tin pa enfrenta un eventual lockdown.
DIARIO for di fin di 2021 a pidi cooperacion di tur ciudadano pa evita loke ta pasa awe ya cu na prome lugar Aruba ta drenta un situacion carga cu problemanan financiero, cu a pajs segun tur experto lo tin problema pa atende.
Na 2020 y na 2021, Aruba tabata tin asistencia Hulandes di prome hora cu entre otro a yuda Aruba pa ekipa su mes riba tereno medico contra e Coronavirus nobo.
Hulanda a yuda Aruba cu e prome asistencia necesario mientras despues Aruba a haya asistencia di Covid-19 pa asina por a introduci plannan di asistencia cu Aruba mes no por a financia.
Mester papia aki di e gastonan enorme cu e pais tabata tin pa crea fondonan ora lockdown a cera porta di entrada na turismo, cu awe atrobe ta na peliger.
Gobierno a permiti trahadonan haya nan entrada y tambe a crea fondonan pa hende cu a keda sin entrada y pa companiananj comercial evita di cay den situacion di bancarota.
Aruba na momento cu el a conoce inicio di recuperacion mester a stop cu e asistencia cu el a brinda y e pregunta serio ta awor, si e pais lo por bolbe introduci yudansa cu el a extende na Pueblo y instancianan comercial pa economia no cay completamente/
E situacion di turismo manera DIARIO a adverti continuamente ta na peliger debi na e hecho cu productornan turistico den exterior tambe ta wordo confronta cu e problemanan causa pa Omicron cu na un forma explosivo ta sigui plama den un poblacion mundial, cu a nenga di tuma e precaucionnan necesario pa evita e pandemia sigui crece.
Fondonan importante di Aruba ta wordo afecta den e situacion cu a presenta actualmente. Mester pensa aki sigur den direccion di AZV, cu mester cubri tur gasto y di e posibilidad cu prijs di cuido medico ta sigui subi loke lo haci cu of Gobierno ta hinca mas placa di belasting den AZV of prima lo mester subi.
Aki no ta papia solamente di test, pero tambe bishitanan na dokter, remedi, mientras mester tene na consideracion e resultadonan financiero di malesa di trahador cu mester sigui haya pago.
Manera DIARIO a adverti, te awor no ta conoci kico realmente lo ta e resultado riba termino largo di Covid-19 pa patientnan.
Aruba awe ta den un situacion cu por considera di emergencia serio debi na e hecho cu falta di trahador ta presenta nan mes pa por garantisa servicio mientras companianan mester tuma medida di prevencion pa na e sitio di trabou, Omicron sigui plama.
Varios banco y otro instancia ya a cambia nan horario di trabou, pero pa DIARIO tabata sumamente importante averigua kico ta pasa cu companianan cu ta brinda servicio basico na comunidad, manera ta e caso cu servicionan di awa, coriente y otro departamentonan esencial.
Prome informacionnan di DIARIO ta indica cu servicio esencial na comunidad ta continua y cu e companianan di utilidad te cu ayera ora DIARIO a ricibi informacion via canalnan informal, ta prepara pa cualkier eventualidad cu te awor no a surgi, Por a comprende cu e companianan mas importante di Aruba ta prepara pa posibilidad di falta di trahador capacita pa mantene servicionan basico na comunidad.
Informantenan a indica cu por papia di un situacion di emergencia na Aruba, manera rond mundo ta conoci.
Expertonan ta insisti pa tur hende coopera den e realidad cu e variante Omicron ta representa pa Aruba, cu mescos cu henter mundo ta sufri di reservanan y fuentenan financiero agota durante 2020 y 2021.
E impresion general di DIARIO, den investigacion continuo, ta preocupante y mester por wordo considera di emergencia debi cu e ta manesa tur hende na un forma sumamente agresivo loke ta nifica cu ta funcionamento di tur sector a na peliger, manera DIARIO ya tin basta tempo ta adverti.
