Cifranan oficial internacional di Omicron ta papia idioma cla --- *Trahadornan den Cuido Medico general ta teme pa nan bienestar --- *Autoridad ta wordo expone na situacionnan peligroso pa nan salud
ORANJESTAD(AAN)—Un situacion sumamente peligroso ta wordo crea pa trahadornan den Cuido Medico den su totalidad y tambe pa representantenan di autoridad cu mester cumpli cu nan deber pa mantene ley den un situacion di emergencia.
Mientras e situacion na Aruba ta escala, informacion di DIARIO di parti di fuentenan den exterior ta indica cu e situacion di Covid-19 na Aruba lo sigui escala y lo exigi hopi di e trahadornan cu Aruba tin riba diferente tereno cu comunidad mester den e situacion actual.
Informacion concreto cu DIARIO a ricibi di tur sector den cuido medico ta indica, cu un parti demasiado grandi di publico no kier realisa e peliger cu nan ta crea pa personal cu no por bay traha na cas of no por dicidi cu nan no ta traha mas.
Un situacion sumamente alarmante ta presenta cerce hende cu mester cumpli cu nan trabau no solamente den hospital pero tambe pafor di hospital caminda cuido medico ta wordo brinda.
Aparentemente tin pashent cu ta na haltura cu nan por tin Covid-19 pero no ta tene nan mes na e reglanan cu mester sigui pa haya asistencia.
Informacionnan ta mustra con hasta personanan cu ta duna prueba di tin sintomanan di Omicron, ta acudi na lugarnan cu ta brinda cuido den varios caso sin mask.
Ora pidi pa nan cooperacion nan reacion no ta esun cu por spera.
Informantenan ta indica cu trahadornan den sector di Cuido Medico ta den problema serio debi na e actitud di demasiado hende, cu no ta tene ni na e reglanan mas simpel pa evita cu ta contagia otro persona.
Representantenan di autoridad, manera Polis, tambe ta wordo expone na situacionnan grave, manera DIARIO a comprende.
Hopi hende no kier uza mask y Polis por haya su mes confronta ta atende situacionnan den cual e seriedad di e situacion ta haci cu nan ta perde e peliger di Covid-19 for di bista.
Un factor cu ta bini dilanti ta e riesgo di salud pa trahadornan den Cuido Medico, Polis y tur sector cu mester keda activo den e situacion actual.
Hopi trahador den e sectornan aki ta agota. Debi na e situacion cu a escala nan mester sigui presta nan servicio.
E situacion ta alarmante pasobra si e cantidad di personal di cual ta dispone, baha den un situacion di problema creciente, Aruba ta enfrenta condicionnan cu por obliga na tuma medida drastico.
Den otro sectornan cu ta atende cu publico tambe ta bini reclamo serio pa loke ta trata e cooperacion di publico.
“Hende ta un problema mas grandi cu Omicron mes,” a wordo trece dilanti dor di un informante.
