Interesante exposicion “Sin sombra shinishi” na Ateliers'89

ORANJESTAD (AAN) — No obstante cu nos ta meymey di Covid-19 ainda, Atelier's89 dirigi pa Elvis Lopez, ta sigui duna workshops y ta organiza opening, un poco mas laat cu e tayernan di trabao a caba.

Den entrevista cu DIARIO, Lopez a menciona cu cada bez nan ta sigui e reglanan sanitario di Gobierno y DVG, pa nan por habri e exposicion.

El a expresa cu awo por mira cu e casonan di contagio a baha bastante prome cu fin di siman, y a dicidi pa tene apertura di nan exposicion Diadomingo 25, anochi.

E exposicion ta titula “Sin sombranan shinishi” y e ta consisti di obranan y diseñonan imprimi na man (printmaker) pa cual a conta cu un maestro fantastico yama Ervin Aguilar. Pa lunanan largo nan a haci un trabao hopi pisa, y a warda dos siman despues pa bin cu e expo. Hunto cu esaki a presenta obranan di arte traha aña pasa, cu ta e exposicion di auto-retrato cu no hopi hende a mire. Diesun artista a realiza nan “self potret” cu ta den e exposicion aki tambe.

Pues, un anochi hopi agradable cu hopi arte pa mira. En total tabata tin 25 artista presente, y tabata masha bunita pa presenta tanto artista pareu, Lopez a expresa.

Ervin Aguilar, di su parti tambe a duna un poco informacion. El a splica cu e ta un artista visual y tabata encarga cu dunamento di les, den luna di Maart, y aworaki por a mira e resultadonan. El a bisa cu tur e obranan, practicamente, ta engloba den “printmaker” y esey ta encera full un diseño traha for di cero. Kiermen, a cuminza cu dibuho y cu otro hermentnan pa yega na e producto final. El a extende un invitacion na e publico amante di arte pa bin wak e exposicion aki, cu ta locual e participantenan a siña durante e tayer di trabao.

Finalmente, a gradici Elvis Lopez pa e confianza den su persona. E ta spera cu mas hende bin disfruta di e expo aki y admira loke nos talentonan local ta crea.