ORANJESTAD (AAN): E siman aki a bira conoci, cu e dama Claire Delight Doering, kende ta asistente ehecutivo di e Vice President di Research di University of Alabama at Huntsville,
a fayece na comienzo di April cu edad di 90 aña, despues di a lucha contra cancer di tripa
Aunke el a nace na 1930 na St. Louis, Missouri, el a pasa gran parti di su bida na comienzo na Aruba, unda su tata a acepta un trabao pa yuda construi y lanta un refineria di Standard Oil, y cu despues a bira Lago Oil Refinery.
Su anuncio di morto publica na Alabama a indica: “Semper el a sinti su mes orguyoso di e distincion di a crece na Aruba, y di tabata e prome baby den e colony di Standard Oil eynan.”
Despues di a gradua na Lago Colony High School, el a bandona Aruba pa atende College na Lindenwood, y a gradua di SMU, Southern Methodist University. El a conoce Lloyd Alan Doering riba un cita sorpresa, y nan a casa na 1952. Hunto nan a haya cuatro yiu, como tambe nieto y bisanieto. Despues di 67 aña di matrimonio, Lloyd a fayece.
Claire mes a retira di University of Alabama at Huntsville na 1993 y tabata activo cu varios organizacion civico activo.
“Claire lo wordo recorda semper pa su sonrisa angelical. No obstante tur lucha cu e tabatin tambe e.o. cu varios cancer, semper e tabatin un sonrisa pa esnan rond di dje. E bida di Claire tabata enfoca pa ta un bendicion pa otronan, y su sonrisa ta algo cu e tabata logra esey.”
Awor ya Claire no tin dolor ni cancer mas, den cielo y cu su sernan stima cu a bay prome cu ne.
Diasabra 1 di Mei venidero lo tin un misa special pe na Covenant Presbyterian Church na Alabama, unda por despedi di dje pa 2:30 pm, y lo tin un misa pa 3:00 pm.
Su restonan mortal a wordo entrega como donacion na Medical School na University of Alabama at Birmingham.
