ORANJESTAD (AAN): Tabata Diabierna cu a pasa, cu Aruba a observa un momento special, esta cu 50 aña pasa, e isla aki a drenta oficialmente e epoca di deporte di Dragracing.
E empuhe den e direccion aki a bin na man di Henny Leo, kende hunto cu algun amigo a lanta Leo’s Racing Team. Y inespera un invitacion a bin di Curacao, cu nan a caba di construi un pista di Dragrace na Koral Tabak y ta bay tene careda dia 30 di April 1971. Y Henny Leo y su team a wordo invita.
DIARIO a dedica un articulo fenomenal na esaki den edicion di Speedworld cu a sali Diahuebs 29 di April 2021.
Atravez di añanan, e team di Leo’s Racing a sa di logra gana caredanan importante, y tambe sobresali den hecho cu nan auto a aparece riba portada di “Stock Racing” na Merca, y tambe den revista di Toyota.
Special pa e di 50 aniversario aki, su yiu homber Giovanni a produci un buki conmemorativo pa festeha e 50 aña aki di Dragrace na Aruba, y tambe dedica na e “Tata di Dragrace”, esta Henny Leo.
“Awor mi ta celebre y recordando tur esnan cu a yuda, y gradici semper na nan cu toch nos a yega asina leu,” Henny Leo a indica. E ta contento tambe cu su yiu homber Giovanni Leo a produci un buki conmemorativo di 50 Aña di Leo’s Racing Team, cu ta documenta tur detaye di nan existencia.
Henny Leo su deseo di mas grandi ta cu e deporte di Dragrace no cay na Aruba.
