Inicio di e prome fase di e proyecto Mon Plaisir College HAVO

ORANJESTAD (AAN):   Diaranson mainta tabata tin un ceremonia special na Mon Plaisir College. Randall Croes, Presidente di Fundacion SPCOA (Stichting Protestants Christelijk Onderwijs Aruba)

a indica cu esey tabata un momento special unda a realisa e ceremonia cu un significado grandi pa SPCOA y na enseñansa na Aruba.

Ta papiando akinan di e proyecto pa amplia e capacidad di e klasnan HAVO na Mon Plaisir College, cual ta un paso mas pa adapta na e crecimento di e poblacion di Aruba den e ultimo 10 añanan y pa crea mas oportunidadnan pa sigui estudio di HAVO pa e hobennan, Croes a splica.

SPCOA ta e fundacion cu a keda cu e responsabilidad di ofrece enseñansa basico, MAVO y HAVO cu Hulandes como idioma di instruccion. Na Aruba tin e opcionnan di scolnan multilingual, na ingles y na Hulandes, a señala.

E prome fase di 5 klas cu ta bay traha di HAVO ta cuminsa e aña escolar aki 2021 y mientrastanto lo huur un localidad adecuado pa ora cu e edificio aki keda cla den e proximo lunanan.

A probecha e oportunidad pa gradici gobierno di Aruba cu a yuda cu sosten pa por realisa e soño aki. Tambe a gradici DOW, contratista y tur esnan cu a colabora cu e proyecto aki, Randall Croes a expresa.

Minister di Enseñansa Armando Lampe tabata tin e honor di haci e develo di e banner cu ta nifica e anuncio di e inicio di e HAVO di Mon Plaisir College.

E maneho ta enfoca den duna e mayornan mas opcionnan riba tereno educativo. Manera a menciona caba, na Aruba tin opcion di estudio na un manera multilingual, na ingles, na spaño como tambe na hulandes.

Gobierno di Aruba ta apoya SPCOA cu a scoge pa ofrece e opcion aki di enseñansa na idioma hulandes.

Ta calcula cu e proyecto aki lo costa rond di un miyon florin pa e prome fase cual ta wordo financia pa gobierno di Aruba.

Ta bay haci uzo di e mayor cantidad posibel di solar panelnan riba e dak den un solo edificio, asina Randall Croes a duna di conoce.