PHILIPSBURG: Tabata Diaranson 23 di Mei cu autoridad a aresta un pareha turista Mericano kendenan a comporta nan mes malisimo,
destrui varios propiedad, y a hasta ataca un agente policial na e isla di St. Maarten.
Nan a wordo libera for di prison, despues cu nan a yega na un acuerdo cu Ministerio Publico.
Den e acuerdo aki, e pareha tin di paga un boet masha grandi mes, y tambe un suma pa cubri tur daño causa.
Nan a firma tambe un acuerdo cu ta prohibi nan di regresa e isla pa 3 aña. E acuerdo aki nifica cu e pareha lo no tin di aparece den Corte na St. Maarten.
E abogado di e pareha, mr. Sjamira Roseburg a bisa riba Diamars, cu e acuerdo tabata voluntario y no ta un aceptacion cu nan ta culpable. El a bisa tambe cu su parehanan ya caba a viaha bek pa Merca.
Prome cu nan a bandona e isla, e pareha a ofrece disculpa na comunidad via un video di 20 seconde cu nan a saca via nan abogado.
“Nos ta pidi disculpa pa e caos cu nos a ocasiona na St. Maarten, e isla bunita. Realmente nos no tabatin intencion di haci esaki, y nos ta sorry pa a asalta e Polisnan,” e muher ta bisa.
“E tabata un eror terible, algo a sali for di man. Nos ta pidi disculpa na Polis y na pueblo, pa e falta di respet,” e homber a bisa.
Ministerio Publico a bisa cu e acuerdo aki no mester wordo mira comosifuera e turistanan ta scapa di haya castigo. Pero mas bien Ministerio Publico a escoge na haci esaki pa atende e caso mas rapido posible, como cu pa warda te ora cu nan presenta den Corte aki 3 luna, lo no tabata efectivo.
Pasobra aki 3 luna ya caba e turistanan lo a bandona e isla sin ningun castigo definitivo, y posiblemente lo no aparece den Corte ora cu yama nan bek aki algun luna.
Pesey a escoge pa pone nan sufri pa nan accion inaceptable, cu boet, paga bek pa tur daño, y e condicion di viahe imponi pa Ministerio Publico. Esaki a pone cu e turistanan a wordo afecta pisa den nan cartera.
Tur cos a cuminza ora cu e turista masculino a forza y drenta den cushina di Topper’s Restaurant and Bar e anochi ey, destruyendo tayo y glasnan, y menaza e trahadornan cu un cuchiu. Nan a nota cu e tabata hopi bao influencia di alcohol.
Dos Polis y tambe un miembro di Cuerpo Voluntario VKS a acudi na e lugar. Algun hende eybanda a graba video di e aresto riba nan smartphone, y e videonan aki a circula tur caminda na St. Maarten. E videonan aki a causa hopi rabia di pueblo riba e accion di e pareha.
Mientras cu e homber visiblemente ta resisti aresto y declara su mes di ta un “gangster”, su pareha a wordo graba riba video ta scop y Polis na su parti delicado y tambe stoma.
Riba e potret aki por mira un videograb unda e pareha ta ofreciendo disculpa na St. Maarten.
