IKDA cu concurso pa scolnan “Mi curason ta bo pesebre” pa celebra 800 aña di tradicion

ORANJESTAD (AAN) — Den conferencia di prensa, Adelin Trimon-Geerman di Instituto Kateketico Dioscesano Aruba (IKDA),

a splica cu nan ta organizando un concurso di pesebre, pa tur scol catolico, kiermen esnan cu ta cay bao di SKOA.

Esaki den marco di celebracion di 800 aña di tradicion di pesebre. “Pa no laga e celebracion aki pasa sin mas, IKDA a organiza un proyecto y un concurso di pesebre pa cual a invita tur scol di SKOA pa nan participa. Pa esaki nos a manda di kleuterklas te eerste cu derde un pintura cu nan ta bay kleur y 4de te 6de cu MAVO scolnan ta bay haya un pa djis corta y plak” Adelin a splica.

El a agrega cu e idea ta pa no tin gasto. E alumnonan por haci’e den klas of hunto cu nan famia. E pinturanan nan ta manda nan via facebook of messenger. Nan tin siete categoria cu ta scol preparatorio, klas 1 te cu 3 cu ta esnan cu ta bay kleur, klas 4 te 6 cu ta corta y plak riba un base.

Pa esnan di MAVO ta conta e mesun rekisitonan pero e base nan por haci’e diferente. Nan por uza groot of con nan ta desea como cu nan ta mucha grandi. Na cada scol tin un pesobre cu nan mag dorn’e pa bay den un concurso. Tambe juffrouwnan den klas por dorna nan pesebre, den e hoeki cu nan ta pon’e. “Normal nos tin un oficina di SKOA, pero cada scol tambe tin un oficina. Y nos tin e proyecto di recicla. E ta un special, esey ta un premio apart cu nan por traha un pesebre y tur hende mag di concursa cu un pesebre recicla”, Adelin Trimon-Geerman a informa.