Tirando un bista riba e origen di turismo cu a surgi cu e Revolucion Industrial
ORANJESTAD (AAN) E historia di e origen di turismo ta hopi interesante y esaki ta un bista cortico atravez di dje. Esaki ta cuminza a raiz di e consecuencianan di e Revolucion Industrial, unda cu e cambionan social y economico cu el a trece cu ne, a facilita e acceso na ocio, descanso y cultura. Awendia e turismo ta henter un industria mundial, y como tal un di e motornan economico principal di e mundo occidental.
E origen di turismo ta remonta na e antiguedad, aunke e ora ey no tabata existi manera awendia. E acto di biaha no exclusivamente pa sobrebibi sino pa ocio, educacion, intercambio cultural, tin su raiznan den diferente civilizacion.
Mas cu 4.000 aña pasa, e Egipcionan ya tabata haci biahe pa motibonan religioso of comercial, y algun elite tabata biaha pa bishita templonan of monumentonan historico. E Griegonan antiguo, tabata biaha pa participa den eventonan deportivo manera e Weganan Olimpico, y pa bishita e santuarionan di nan diosnan. E biahenan aki tabata tin un gran componente cultural y religioso.
E Romanonan a desaroya un amplio red di caminda cu a facilita e desplazamento door di e Imperio. E romannan rico, tabata realiza biahenan di placer na e Costanan Mediteraneo, na lugarnan termal y village, locual por wordo considera com un precursor di e turismo di ocio/descanso.
E turismo medieval, den e siglonan V pa XV, a caracteriza su mes pa e peregrinacionnan.
Durante e Edad Medio e biaha cu motibonan religioso tabata un di e prome formanan di turismo. E peregrinacionnan na lugarnan Sagrado manera Jerusalem, Roma of Santiago di Compostela, tabata comun. E peregrinonan tabata biaha te distancianan grandi en busca di redencion spiritual of milagronan.
Fuera di e peregrinahe, e caravananan comercial tabata conecta Europa, Asia y Africa, facilitando e intercambio di productonan y tambe di ideanan y custumber entre e civilizacionnan.
Na Europa, e Grand Tour den Siglo (XVII-XVIII) tabata un practica comun entre e hobennan aristocratico, specialmente esnan di Inglatera, cu tabata biaha door di e Continente pa completa nan educacion. Nan tabata bishita ciudadnan manera Paris, Roma, Venecia y Florencia pa studia arte, historia, filosofia, y e cultura clasico. Esaki tabata un precursor di e turismo cultural. E auge di e turismo moderno a tuma lugar den e siglo XIX cu e Revolucion Industrial, cu e yegada di e ferocaril y e barconan di bapor, loke a permiti cu e clase medio emergente, cuminza e biahenan di placer. Durante e Era Victoriano, e clasenan economicamente acomoda, a cuminza biaha pa e destinan di beach, y balneario, marcando e inicio di e turismo di salud y descanso.
