Hotel ta sigui enfoca riba calidad enbes di cantidad di huesped

Analisis haci door di AHATA:

ORANJESTAD (AAN): E siman aki, Aruba Hotel & Tourism Association (AHATA) ta acumula e cifranan di ocupacion y prijs di hotelnan tur luna y CEO di AHATA, Tisa LaSorte, ta anuncia cu na October atrobe e RevPAR a crece pa motibo cu huesped ta pagando prijs mas halto, pero tin menos ocupacion compara cu experiencia historico.

   Pa luna di October 2023, ta mira cu riba tereno di ocupacion, e grado di ocupacion tabata 74%; cual ta mescos cu grado di ocupacion na October 2022 y 5% menos cu na 2019.

   ADR: E balor promedio di cada camber bendi tabata $285.19; un aumento di 6% compara cu October 2022.

   RevPAR: E entrada promedio pa tur camber disponibel tabata $210.60 cual ta 6% mas cu na 2022 y 22% mas cu na 2019. RevPAR ta e indicador di e resultado financiero prome cu desconta gastonan operacional y impuesto.

   Analisando e situacion for di 1 Januari 2023 te cu October 2023, riba tereno di Ocupacion por nota cu e promedio di ocupacion di prome 10 luna di aña tabata 77%; un aumento di 5% compara cu e mesun temporada na 2022. (Nota: Den prome kwartaal di 2022 Aruba su turismo tabatin efecto di Covid). Ocupacion averaha di prome 10 luna di 2023 ta 9% menos cu e mesun temporada na 2019.

  ADR: E balor averahe di cada camber bendi tabata $337.64; cual ta 12% mas cu mesun temporada na 2022.

   RevPAR: E averahe di prome 10 luna tabata $261.34; 18% mas compara cu e mesun temporada na 2022 y 13% mas cu na 2019.

   PROYECCION: Proyeccion actual pa ocupacion averahe di hotel pa November ta 78%, December ta 79%, y pa Januari ta 78%. E expectativa pa aña 2024 su ocupacion averahe ta 73%, cual ta representa un reduccion di 13% compara cu e averahe di aña 2019.

   TIMESHARE: Segun AHATA, data cu nan a ricibi ta indica cu ocupacion na propiedadnan Timeshare tabata 85% na October 2023.