Ministro Ursell Arends
ORANJESTAD (AAN): Ministerio di Naturalesa a lansa e proyecto di agroforesteria sintropico pa ofrece scol basico e oportunidad di crea un plantacion di mata y fruta. Den e forma aki ta inculca balornan di agricultura sostenibel den nos muchanan.
Minister Arends ta haci un yamada na scolnan basico pa registra pa e proyecto. E proyecto ta bou guia di Santa Rosa y Living Soil Aruba pa asina apoya scolnan basico pa incorpora sector primario como un herment educativo. Ministerio di Naturalesa lo provee e 10 scolnan cu lo forma parti di e proyecto piloto sosten di material pa por crea plantacion di mata riba tereno escolar. Ademas, personal di scol y boluntarionan lo ricibi training tocante e tecnicanan di agroforesteria, mantencion y cuido di e plantacion di mata. E proyecto ta planea pa cuminsa na januari 2024.
E tecnica di agroforesteria ta aporta na un miho calidad di e suelo, percura cu e matanan ta fortifica otro y elimina e necesidad di pesticida. Ademas, e proyecto ta aporta na siguridad di alimentacion y autosuficiencia, cu un enfoke ariba scolnan cu kisas ta limita pa motibonan financiero of falta di guia.
Minister Arends ta remarca cu muchanan ta e futuro di nos pais y pa medio di proyectonan agricola nan por siña di unda nan cuminda ta bin y tambe e importancia di plantamento. Tambe lo integra e conocemento adkeri di e proyecto den e curiculo escolar y asina percura pa continuidad di e proyecto. Den futuro e muchanan por crea un plantacion na nan hogar y aporta na Aruba su siguridad di alimentacion.
Tuma e oportunidad di registra via e siguiente link:
Registracion ta habri te cu dia 15 di november 2023. Un carta a worde manda na bestuur di scolnan basico cu mas detayes relaciona cu e proyecto aki. Pa mas informacion por tuma contact cu عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته..
Ministerio di Naturalesa ta gradici e scolnan cu ya caba a registra pa e proyecto di agroforesteria sintropico y ta encurasha otro scolnan basico pa registra pa asina provee oportunidad di educacion practico pa nos muchanan.
