Hoben special di Aruba lo participa den evento di Festival Internacional na Republica Dominicana

Tanique tin yen animo y briyo

ORANJESTAD (AAN): Diasabra anochi DIARIO tabata presente na Mi Dushi Casibari, na momento cu e organizacion di Chaz Models a haci instalacion y coronacion di cuatro candidata cu ta bayendo rumbo pa Republica Dominicana e siman aki.

   Nan ta bay participa na Festival del Talento y La Belleza Internacional 2022.

   Ademas di un candidata pa Mini Modelo, candidata pa Pre-Teen Model 2022, y candidata pa Beautiful Aruba 2022, DIARIO a nota cu e candidata pa e categoria di Teen Model Aruba 2022 a hala atencion mesora.

   E directora Chastity Kock-Hodge a introduci publico na e dama Tanique Chan, kende tin 18 aña di edad y cu a wordo corona e anochi ey como ‘Miss Teen Model Aruba 2022’.  El a wordo instala cu su sjerp door di Maryorie Fernandes Pedra, kende ta docente na Paso pa Futuro, y e corona a wordo poni door di Marielena Tromp.

   Chastity Kock a splica na publico presente, cu pa prome biaha Aruba ta bayendo exterior pa busca e corona, y ta hiba un dama special pa competi.  El a referi na Tanique Chan.

   “Inclusion ta habri caminda, y e ta bay demostra cu nos muchanan special tambe por, tambe ta inteligente, y tambe ta talentoso,” Chastity a indica den su introduccion.

   Tanique cu su 18 aña di edad ta participando den e certamen di Miss Teen Model International 2022.

   “Aruba por ta fuertemente satisfecho y hopi orguyoso di Tanique, pasobra mi ta hopi sigur cu e lo bay planta hopi respet den e certamen internacional aki,” e directora di Chaz Models a sigui bisa.  Aki e publico a duna un aplauso fuerte di aprobacion.

   Riba escenario por a mira Tanique a subi den su trahe di baño, tambe despues den su trahe di gala, y tambe su cocktail dress.  E sa bon con pa cana, con pa modela, y con pa pose pa e fotografonan presente.

   Tanique a haya chens di papia den mic, y a demostra cu e ta cla pa e certamen na Republica Dominicana, como cu el a introduci su mes na spaño, bisando su nomber, cu e tin 18 aña, y e ta representa “la isla de Arubaaaaa’.  Publico a bira loco aki y a dune yen di aplauso.

   Di awor caba DIARIO ta desea Tanique y e demas candidatanan Thaheely, Maya, y Anabell tur clase di exito.