Gobierno a declara Aruba bao Codigo Oranje

||| Shelternan lo habri solamente si ta necesario despues di maltempo

*Tur Departamento di Gobierno ta cera awe 12:00 pm

*Tur scol lo ta cera Diahuebs y Diabierna 

ORANJESTAD (AAN): Diamars merdia durante un conferencia extraordinario, Team di Calamidad di Gobierno a anuncia cu e momento ey ainda ningun Tropical Storm Watch y tampoco Tropical Storm Warning a worde emiti, toch Aruba ta dicidi na anuncia cu e isla ta ser poni bao di CODIGO ORANJE.

   Esaki ta relaciona cu e mal tempo cu lo ta pasando Diaranson anochi pa Diahuebs mainta den cercania di e isla. Ta referi aki na e maltempo cu kizas lo bay worde batiza como Tormenta Tropical Bonnie.

   Pero keto bay e maltempo aki, Diamars merdia 2:00 pm tabata riba Oceano Atlantico pariba di Trinidad & Tobago. Te ainda e tabata djis un mal tempo, y ainda no a bira un Depresion Tropical.

   National Hurricane Center a adverti cu e lo trece hopi yobida y biento fuerte. Ta calcula cu lo ricibi entre 101 mm y 152 mm di awacero den e area aki.

   Gobierno a emiti un Codigo Oranje, y den cuadro di esey a tuma decision cu Diaranson merdia pa 12:00 pm, pa cera tur Departamento di Gobierno, y tur ambtenaar tin di bay cas. E Codigo Oranje aki ta valido solamente pa empleadonan publico. Si acaso Sector Priva ta interesa di sigui e ehemplo di Gobierno y manda nan trahadornan tambe cas, esey lo por ta algo admirable.

   Solamente si acaso Gobierno declara Codigo Cora, e ora si ta obligatoriamente Sector Priva tin di manda empleadonan cas.

   Lo no tin scol: Mientras tanto, Gobierno a dicidi tambe cu tanto Diahuebs 30 di Juni 2022, y tambe Diabierna 1 di Juli 2022, lo no tin scol na Aruba.  Esey nifica cu cualkier proefwerk, tentamen, of actividad di scol planea ainda pa e fechanan aki, lo tin di cambia pa otro.

   Tur evento deportivo ta wordo cancela pa Diaranson anochi.  Ta deseable pa awenochi ningun hende ta riba pia, of den auto mas ta core rond.

   Gobierno ta pidi e funcionarionan cu ta bay cas trempan, pa nan haci nan cura di cas limpi y percura pa yuda otronan cu di nan mesun forza no por haci esey.

Prome Ministro Evelyn Wever-Croes a bolbe mustra cu debi na e cobertura grandi di nubia cu ta acompaña e mal tempo aki, e lo cuminza basha awa desde Diaranson atardi 6:00 pm caba riba Aruba! El a bisa cu Aruba lo bay sinti 3 dia largo di awacero.

   E grafico aki ta mustra cu Diaranson anochi 8:00 pm, e centro di e maltempo aki lo bay ta den cercania di Bonaire. E calculo ta cu banda di 2:00 am e lo ta cerca di Aruba. Pa Diahuebs mainta e ta ser calcula di ta yegando Riohacha na departamento di La Guajira na Colombia.

   Tur esaki ta segun e pronostico, aunke no sa kico exactamente lo socede cu e maltempo aki ora e drenta Caribe. Ta conoci cu maltemponan aki cu ta pasa “grawata curpa” na e seronan halto cu tin a lo largo di Venezuela, semper tabata yuda kibra tormentanan. El a hasta bira conoci como ‘Santana di Horcan”, pasobra e seronan halto ta mata horcan cu pasa den e area.

   Vigilando si ta hisa prijs:  Aunke Gobierno a pidi pa ningun hende bay den panico, riba Diamars a bira conoci cu varios supermarket a keda sin bateria.  Hendenan a bay cumpra esakinan, pensando cu kizas coriente lo ta un comodidad cu lo cay afo durante mal tempo.  Tambe a mira hopi rij di auto yenando gasolin.

   Sperando cu ningun negoshi ta bay hisa prijs intencionalmente awe, tin indicacion cu Gobierno lo ta observando tur esaki pa evita esey si socede.