Grupo di studiante di Universidad di Aruba y Haagse Hogeschool a haci un bishita na Parlamento

Parlamentario Evelyn Wever-Croes:

ORANJESTAD (AAN): Diahuebs ultimo, Lider di Fraccion señora Evelyn Wever-Croes y Parlamentario Endy Croes tabata presente den sala di Parlamento den un encuentro hopi special cu un grupo di studiantenan di Haagse Hogeschool y Universidad di Aruba, cu ta sigui nan minor ‘Koninkrijkszaken’. 

E studiantenan a yega prepara bon y a presenta preguntanan critico, nan tabata interesa den e trabou di Parlamento y tambe a desea clarificacion riba algun punto importante na bienestar di Aruba. 

Sra. Wever-Croes a expresa di ta hopi contento di por a participa activamente den e intercambio aki, pa scucha e punto di bista di e studiantenan, pa contesta tur e preguntanan, y pa enfatisa cu hopi di e decisionnan tin impacto directo riba futuro di e studiantenan. Segun sra. Wever-Croes, mantene e lazo cu studiantenan ta esencial pa transparencia, pa involucracion civico, y pa percura cu nan ta bon informa tocante decisionnan nacional y tambe posicion di Aruba den Reino. 

Lider di Fraccion a finalisa gradiciendo e studiantenan, docentenan di Haagse Hogeschool y Universidad di Aruba pa e interes y presencia na Parlamento.