Un obra cu Tomas y su famia kier expresa su amor y gratitud pa e isla y su pueblo
ORANJESTAD (AAN) Señor Tomas Gonzalez, un residente Argentino kende tin mas cu 30 aña biba na Aruba, isla cu e ta considera su mes cas, ta trahando riba un proyecto yama “Un Cruz pa Aruba”, cual e tin den maquette.
Tomas a yega na e inspiracion durante e tanto biaha cu el a pasa riba e caminda ey, observa e sero, te cu finalmente el a logra materialize den e maquette cu el a traha, di cual a pasa siete aña caba.
Den entrevista cu DIARIO, e ta splica kico su proyecto ta encera: “Un Cruz pa bendiciona e Pais Aruba y su pueblo, cu den su mayoria ta Catolico. Un Cruz na e parti halto di su Sero di Hooiberg, y cu lo ta visible for di cualkier punto di e Isla, door di su diseño unico cu ta bay identifica e pais aki na un forma unico den Caribe.
“E Cruz aki a wordo diseña cu iluminacion propio y lo bira orientacion pa piscado, hende local y turistanan, sumando beyeza y originalidad unico. Tambe lo cumpli un rol di orientacion como faro den lama, pa su luz.
“Sigur e lo aporta gran interes den lo turistico, pa un gran postal identificativo di Pais Aruba. Lo tin diferente posible forma di realiza e inmenso y anhela proyecto aki, cu aporte y participacion di e pueblo, cu seguramente, lo aproba e ilusion aki, y sigur tambe cu e aporte di gobierno pa su logro y realizacion, cu lo ta finalmente door di henter comunidad religioso y bendiciona.
“Naturalmente, pa su realizacion e obra aki lo ta encomenda na e profesionalnan ‘idoneo’: arkitecto, ingeniero, y demas persona inherente na e obra aki. Di e forma aki, mi ta laga e motibo di mi gradicimento y como legado na mi famia, kendenan nos ta biba gran parti di nos bida den e tera bendito aki: casa, ruman, yiu, nietonan y henter pueblo di Aruba, paraiso na mundo! Danki inmenso”, señor Tomas Gonzalez a conclui.
