Aunke PG a nenga tur, Hof a aproba pa scucha dos testigo
- Hof lo no bay tras di sentencia di un caso civil
ORANJESTAD (AAN): Dialuna mainta Hof di Corte Superior a cuminsa cu e apelacion den e caso Flamingo. E apelacionnan ta di Otmar Oduber, Farida Esser y Rachelle Wever. E caso no a worde trata sino un preparacion “regie” caminda abogadonan tin oportunidad di pidi Hof pa haci investigacion(nan) cu nan ta desea.
Ta asina cu Esser a worde declara liber y Ministerio Publico a apela esaki. Den caso di Oduber, tanto e abogadonan mr. Illes y mr. Carlo como Ministerio Publico a apela y Wever a apela e sentencia. Por a nota cu Procurador General ta worde asisti pa un otro o sea tin dos Procurador General pa e caso aki. Ta asina cu ta solamente e abogadonan di Oduber a haci peticion pa scucha testigonan.
Otmar ta convenci cu e ta inocente: Despues cu PG a presenta tur e acusacionnan contra Oduber, Esser y Werver, Hof a puntra Oduber pakico el a apela. Oduber a bisa Hof cu el a apela pasobra cu e ta convenci cu e no a haci nada malo. El a bisa Hof cu p’e, e apelacion ta hopi importante pa su carera y pa tur e asunto aki keda aclarea.
Abogado mr. Carlo a bisa Hof cu nan ta persisti riba nan peticionnan aunke cu PG a nenga. E abogado a pidi Hof pa scucha e dama Wever den caso Malmok, aunke cu PG ta haya cu Wever a worde interoga suficiente. Nan ta haya cu mester bin claridad riba e asunto di pasamento di tereno y asina mustra cu Oduber mester keda declara liber.
Pa e asunto di empleadonan spirito, e abogado ta haya cu inhustamente a condena Oduber, a base di sentencia di un caso civil riba e asunto aki, cu tanto Ministerio Publico y Hues a uza como prueba. E abogado ta haya cu e sentencia den e caso civil no tin nada di haci cu e acusacion contra Oduber. E kier scucha diferente persona pa cu asunto di empleadonan spirito.
Cu empleadonan spirito, kiermen cu Oduber tabata paga hendenan pa traha pero nan no tabata presenta na trabao y no tabata traha. En total a pidi pa scucha 6 persona pa e caso di empleadonan spirito.
Hof a puntra Oduber si e ta corda kico el a declara den Corte den Promer Instancia tocante caso Malmok. Hof a mustra cu Oduber a bisa cu a skirbi un maneho pa cu dunamento di terenonan y tambe a publica esaki. Oduber a splica Hof cu a traha e maneho y cu tabatin excepcion pa esnan cu kier tereno grandi. Oduber a bisa cu a informa prensa di e excepcion pero no a publica esaki. El a bisa cu Gobierno si tabata sa di esaki.
PG a reacciona y a bisa Hof cu e ta haya cu no tin necesidad pa e interogacionnan aki.
Oduber a bira emocional: Oduber na su turno a bisa Hof cu e ta haya importante pa scucha e testigonan cu lo mustra cu e maneho tabata promer cu el a bira minister y te ainda e maneho ta sigui den Gobierno.
Oduber a splica cu el a hiba e maneho pasobra e no kier laga crea e imagen cu lo tin fabornan politico. Oduber hopi emocional a pidi Hof pa tuma un decision mas pronto pasobra e caso aki tin añanan ta andando y e ta afect’e masha hopi.
Dos testigo lo worde scucha: Hof a pospone e caso y a tuma su tempo pa evalua. Despues di mas o menos mey ora, Hof a bolbe y a dicidi cu no ta bay scucha e testigonan den caso Malmok. Hof no ta mira motibo pa bolbe scucha e testigonan pasobra nan a worde interoga caba.
Pa loke ta e peticion pa scucha 6 testigo den caso empleadonan spirito, Hof a dicidi cu lo bay scucha 2 testigo so, kendenan tabata hopi cerca di e trabao di Oduber e tempo ey. E otronan ta worde rechaza.
Hof a sigura Oduber cu durante tratamento di e caso lo bay profundo y mira si tin ambtenaarnan spirito of no y no lo bay tras sentencia di caso civil manera tabata e caso anterior.
Te Juni 2026 lo trata e caso: Hof a bisa cu lo bay instrui Hues Comisario pa scucha e 2 testigonan. Hof a dicidi cu dia 1 Juni 2026 lo cuminsa tratamento di e caso y lo bay aparta henter e siman pa asina tin e tempo necesario pa e caso.
