Grupo di RCC Aruba a representa e isla den exterior un bes mas

ORANJESTAD (AAN): Rhythms Circus Company (RCC Aruba) ta conoci localmente pero tambe mundialmente pa nan logronan increibel den e mundo di circo.

E grupo a representa Aruba na un nivel internacional y a gana varios premio y reconocimiento pa nan talento y profesionalidad. Nan a presenta riba e escenarionan di mas grandi y popular, manera America's Got Talent, Budapest Circus Festival, Hippodrome England, y hopi mas.

   Na e comienzo di October 2023, RCC a cuminsa cu un reto grandi pa asina nan por sigui hiba Aruba su nomber dilanti internacionalmente. E biaha aki, nan a biaha mas di 14,000 km di Aruba t'e cu China pa representa nos isla na e Wuqiao International Circus Festival. E evento aki ta un tradicion na China pa 36 aña caba, y e ta conoci pa uni e miho acrobatnan na mundo.

   E biahe pa China a dura 3 dia largo, pero ta algo cu, pa RCC Aruba, tabata bale la pena. Nan a acepta cu hopi orguyo pa tin e honor di representa nos isla y competi riba e mesun escenario hunto cu otro gruponan sumamente talentoso den nan linea di trabao. E grupo di acrobacia local a keda na China pa 3 siman pa por prepara adecuadamente y train riba un escenario nobo.

   Manera ta conoci, RCC su acto mas popular ta encera un circulo di candela cu un di e artistanan balente ta bula door di dje; algo cu ta pone curazon di e publico bati asina duro cu bo por casi scuch'e. Lamentablemente, pa motibo cu no tabata permiti candela den e lugar di e evento, RCC a haya nan mes forsa pa sigui cu e show den un diferente manera y experimenta cu efectonan di luz na lugar di candela. Asina mes, nan tabata tin e publico completamente gana cu tremendo reaccion y aplauso.

   "E tabata un experiencia espectacular cu nunca nos lo lubida, y nos ta hopi agradecido pa e oportunidad." Diego y Yamila, e dos directornan di RCC Aruba a declara den un entrevista.

   Recientemente, RCC a regresa Aruba pa sigui demostra nan talentonan localmente. Bo por wak nan tur Diaranson y Diabierna na D&Y Cabaret (Paseo Herencia Ballroom) pa experiencia e emocion pa bo mes, y wak e maraviyoso acto di candela dilanti bo wowonan. E grupo talentoso aki ta invita un y tur pa bin disfruta di un experiencia unico pa un prijs hopi atractivo pa personanan local, pa celebra nan regreso.