ORANJESTAD (AAN): Durante un conferencia di prensa unda Prome Ministro Evelyn Wever-Croes a introduci señora Zulema Dabian-Erasmus como Aruba su Ministro Plenipotenciario nobo na Washington, e titular nobo a hiba algun palabra tambe.
Señora Dabian-Erasmus a bisa cu e tin e honor di sirbi su pais como e siguiente Ministro Plenipotenciario na Washington, DC. El a bisa cu e oportunidad aki ta uno cu nifica hopi p’e, y ta un chens unico den su carera, un trayectoria cu a cuminsa cu su estudio como ‘International Relations’ na Rijksuniversiteit Groningen, despues di esey a eherce diferente funcion como ambtenaar na Aruba den ramo di Relaciones Exterior.
E oportunidad aki tambe ta nifica hopi como miembro di famia. Aunke su famia no a bin di uno cu a traha pa Gobierno, e.o. su welo a traha pa Lago, su welanan tabata ama di cas, su tata a traha na NAPA Auto Parts y despues a habri su mesun negoshi. Su mama a traha na Bogaard Assurantien te ora cu el a fayece. Toch asina nan a eduk’e pa traha duro den tur loke el a haci, y mester ta orguyoso di su raiz y di ta biba na Aruba. E ta algo emocionante, como cu nan a siñ’e cu mester usa su talentonan pa ta responsable pa su famia. Pero Zulema Dabian-Erasmus a rek esaki pa e por sirbi pais Aruba.
“E oportunidad aki tambe ta hopi special pa mi como representante di Aruba,” Zulema Dabian-Erasmus a declara, mustrando cu Prome Ministro a enfatisa cu relacionnan di Aruba cu Merca ta hopi importante.
“Nos tin relacionnan [cu Merca] estrecho historicamente y mester sigui traha riba e aliansa cu Merca, pasobra esaki ta trece beneficionan riba e tema di desaroyo economico, riba tema di nos seguridad, pero tambe importante cu un pais grandi manera Merca ta brinda hopi oportunidad pa nos hobennan, y eynan mi kier enfoca mi mes sigur,” señora Dabian-Erasmus a declara.
“Mi ta cla pa siña tur cos, y mi kier aporta pa mantene cu mi isla ta uno dushi pa biba. Mi ta honra y agradeci un biaha mas na Gabinete Wever-Croes II cu mi a wordo nomina, y awor nombra como Ministro Plenipotenciario na Washington, DC.”
El a sigui bisa: “Den e ultimo añanan el a traha duro for di Directie Economische Zaken pa Gobierno, en especial pa Ministro Maduro y Ministro Wever, y nos a traha hopi duro pa conecta e comunidad comercial cu oportunidadnan den region, y awor den mi funcion nobo mi tin gana di pronto traha di cerca cu Embahadora na Washington DC, cu Joselin Croes cu ta director di Directie Buitenlandse Betrekkingen, cu Ministronan y Directornan di diferente departamento gubernamental.”
“Tin hopi trabao pa haci riba diferente tema, manera di seguridad, nos posicion geo politico, y tambe pa mehora y mantene contacto cu studiantenan Arubiano na Merca y Canada, riba nos desaroyo economico, cambio climatico, pero tambe pa vocifera nos cultura y balornan, pasobra esey tambe ta parti di diplomacia,” segun e Ministro Plenipotenciario nobo a indica.
