Charlene Leslie di Fundacion Diabetes ta bolbe reta pueblo:
ORANJESTAD (AAN) – Charlene Leslie, di Fundacion Diabetico Arubano, den entrevista cu DIARIO a comenta cu e ultimo añanan por mira cu tin hopi mas movecion na Aruba, kiermen e hendenan ta mas activo, pero importante di esaki pa Diabetes ta e frecuencia y consistencia di haci movecion.
Di otro banda, alimentacion y estado di animo tambe ta importante, esta e aspecto social y emocional, pues tur esakinan ta link na otro.
El a subraya cu no mester wak esakinan como un factor so, sino como un pakete completo. Den e alimentacion specificamente, ta e cantidad cu hende ta come; tin biaha e porcionnan ta mucho grandi, pero tambe e escogencia. “Relaciona cu Diabetes nos ta pensa mucho lihe riba carbohidratonan y sucu. Esey no kiermen cu nos no mag come nada di carbohidrato, sino mas bien cual escogencia ami ta haci. Djis scoge pa carbohidratonan complex cu ta contene mas fibra cu ta bon pa salud, y evita e carbohidratonan simple, cu tin hopi sucu agrega”, Leslie a trece dilanti.
El a reitera cu Fundacion Diabetico, hunto cu otro organizacionnan manera DVG, Health Lifestyle Center, ImSan, Hospital, y Wit Gele Kruis, ta organizando e reto cu a cuminza dia 14 te cu dia 20 di November awo, yama “Sucu Challenge” pa evita e consumo di tur producto cu tin sucu agrega, pues tur cos dushi, refresco, juice, etc., “pa reta nos mes y wak si nos por”. Charlene a haci un yamada na comunidad pa enfoca riba estilo di bida y percura pa un bon base na scol y na cas tambe pa e muchanan come saludable, keda activo, reduci e riesgo hasta si e mucha tin sobrepeso of obesidad. Pasobra si e tin sobrepeso of obesidad caba, ora e bira mas grandi e riesgo pa haya diabetes ta bira mas grandi, e ta keda aumenta. “Pues ban enfoca riba e salud di nos muchanan”, el a reitera. Pa pueblo en general, pa cada persona conoce su riesgonan, tuma e stapnan necesario y preveni diabetes!
