Grupo di dama Pegasaya a cumpli 40 aña di existencia y a celebr’e como e famia cu nan ta

Señora Mena, Presidente, a relata:

ORANJESTAD (AAN) – Den fin di siman, e grupo di damanan di Paradera “Pegasaya”, a cumpli su di 40 aña di existencia. E presidente di e grupo, señora Mena, a splica cu 40 aña pasa, un grupo di dama a dicidi pa reuni y lanta e grupo aki pa amanan di cas, pa un bez pa siman y te ainda  nan ta bin hunto diaranzon anochi.

E ora ey nan ta laga trabao di cas un banda pa haci un otro actividad desde les di protocol, etiketa, makiyahe, pasarela, te canta, haci comedia, pues un desaroyo general, y nan ta ricibi diferente curso.

Ultimo añanan Fundacion Ta Bida, ta organiza e cursonan y e grupo ta manda miembronan cu ta interesa pa bay pa sigui e curso.

E grupo Pegasaya ta consisti, actualmente, di solamente 14 miembro, pero nan ta damanan fuerte. Esun di mas edad tin 84 aña y el a cuminza cu e grupo 40 aña pasa, y e ta sinti su mes hopi contento cu e famia aki.

No obstante aworaki nan tin e meta di haya mas miembro, den edadnan mas hoben cu nan tin, p’asina e mas hobennan hunto cu esnan mas grandi, por sigui cu Pegasaya pa algun aña mas.

Pegasaya ta un grupo hopi uni, aunke de vez en cuando por tin diferencia di opinion, pero semper nan ta nechi cu otro, pasobra “famia nan ta!” Y nan ta keda asina.

Algo hopi bunita ta cu e presidente di e grupo, tur dia mainta, merdia y si por anochi tambe, ta manda mensahenan positivo y di motivacion pa e demas miembronan, y nan ta gusta esey.

Mena a gradici tur persona cu semper a duna Pegasaya un sosten. E miembronan mes, nan famia na cas cu ta aporta y ora cu tin actividad e famianan tambe ta participa, por ehemplo pa e celebracion di 40 aniversario famianan a bin cu yiunan.

El a gradici tambe e directiva di parokia, cu ora nan wordo acerca pa haya e club nan ta haye, logicamente si no ta ocupa cu algo otro. Tin varios otro instancia cu ta sponsor ora e grupo mester y semper por conta riba nan.