Parlamentario Marco Berlis (MEP):
ORANJESTAD (AAN): Den 7 aña di gobernacion nos por conclui cu hopi a wordo haci pa nos pensionadonan apesar cu nos pais a pasa den un pandemia devastador. Aruba su prome aña di recuperacion financiero completo tabata na 2023. Pesey, di un forma responsabel gabinete Wever-Croes a cuminsa duna bek na diferente grupo di persona di nos comunidad.
Iniciativanan pa yuda nos pensionadonan
Danki na e disciplina di gobierno nos economia a crece, nos turismo ta kibrando record, gobierno ta a bin ta drecha e situacion financiero di nos pensionadonan responsablemente:
- Pensioen a subi 4 biaha den 7 aña di gobernacion di Gabinete Wever-Croes, y a yega na un aumento di 14.7% sin conta e aumento cu Minister Oduber lo anuncia e aña aki ainda. (2024)
- A baha e prima di AZV di 10.5% pa 5.0% pa e prome 30.000 florin di nan entrada.
- A hisa suma liber di impuesto pa 30.000 florin pa asina baha e peso fiscal specialmente di pensionadonan.
- A subi e pensioen di biehes pa soltero di 1.107 florin pa 1.265 florin, y pa pareha casa di 1.864 florin pa 2.130 florin pa luna. Esaki ta un aumento di 158 florin pa soltero y 266 florin pa pareha casa.
- Aumento di 100 florin di reparatie toeslag den 7 aña di gobernacion, cu ta ekivalente na 1.200 florin pa aña.
- A separa cobransa di impuesto pa pareha casa cu pensioen di SVB pa asina baha e pero fiscal pa pensionado.
Gabinete Wever-Croes a aumenta pensioen.
Ban haci un calculacion bruto cuanto e pensionadonan a bay dilanti, y basa esaki riba un pareha cu tabata gana 1.864 florin di pensioen pa luna. Prome, nan a haya un aumento y a yega 2.130 florin cu ta un aumento di 266 florin pa luna. A baha 5% di prima di AZV cu ta 5% di 2.130 florin= 106.50 florin pa luna. Un aumento di 100 florin di reparatie toeslag. Si mi conta e sumanan aki cu cual a yuda nos pensionadonan esaki ta: 266+106.50+100 cu ta un total di 479 florin pa luna! Esaki kiermen cu e pensionado a bay dilanti cu 479 florin pa luna den 7 aña di gobernacion di Gabinete Wever-Croes sin conta ainda e aumento di pensioen di e aña aki cu lo por ta rond di 3%. Asumiendo e lo ta 3% e suma total lo bira 479 florin + 3% = 14.37 florin, cu ta un total di 493.37 florin pa luna of 5.920.44 florin pa aña!
Contrario na AVP, desde Gabinete Wever-Croes a drenta gobierno, a subi pensioen den diferente forma entre 2017-2024 di un forma responsabel. Mike Eman, cu ta experienciando un AVP kibra y cu ta insisti pa brasa corupcion, awor ta gritando rond cu e lo subi pensioen cu 50% apesar cu SVB a laga traha un rapport riba idea di Mike Eman, y e rapport ta conclui cu e aumento aki lo ta devastador pa e fondo di pensioen! E rapport ta mustra diferente scenario cu tin un solo conclusion riba Mike Eman su supuesto plan: “pa 2026 no lo existi fondo di pensioen.” Pueblo, no lubida cu Mike Eman a laga nos pais cu deficitnan historico anualmente entre 180 miyon pa 445 miyon cu a desata un crisis financiero catastrofico aki na Aruba, y cu Mike a corta, masacra, ranca y pone medida pisa riba pensionadonan lagando nan entrada na snechi!
