Edwin Jacobs, director di AZV:
*Asina lo cumpli cu palabracion di fortifica prome liña di cuido haci aña pasa
ORANJESTAD (AAN) – Director di AZV, Edwin Jacobs, tabata anfitrion di e conferencia di prensa, relaciona cu e firmamento di contrato entre Wit Gele Kruis y cinco POH nobo, cu ta bay traha riba tereno di salud mental ora nan termina e opleiding cu nan ta bay cuminza dia 1 di September proximo, pa cuminza eherce na 2025.
Edwin Jacobs a expresa: “E Organo Ehecutivo di AZV tin e placer di ta anfitrion di e Conferencia di Prensa aki, na unda Stichting WGK ta bay ta firmando cu e candidatonan cu ta bay sigui e opleiding di POH GGZ.
“Esaki sigur ta un bon paso den sigui amplia y profesionaliza e cuido mental na Aruba. Den cuadro di e acuerdo cu nos a cera aña pasa di cuido, a palabra cu nos lo fortifica e prome liña y cu e POHs GGZ akinan, nos ta cumpliendo cu fortifica esaki”, Jacobs a señala.
El a agrega cu salud mental tin ainda un caminda largo pa bay. Den e desaroyonan den Parlamento por nota cu tin un sosten politico pa pasa e cuido di salud mental pa wordo cubri door di seguro. “AZV a demostra e ultimo 22 añanan, cu su presencia den cuido medico ta garantiza accesibilidad na e aseguradonan na un cuido di calidad y tambe un cuido sostenible. Y realmente, aworaki cu nos tin un parti di e cadena di cuido y salud mental asegura, ainda falta un parti y nos tin pleno confianza cu den e proximo lunanan nos dilanti, lo encamina e caminda pa percura pa e pida parti aki por keda asegura, y asina tur asegurado band’i tambe nos tin acceso na cuido di salud mental. E ora ey, mi ta kere nos por bisa, nos por sigui desaroya na un forma sostenible y duradero e sector aki”, Edwin Jacobs a acentua.
Director di AZV a acentua cu POH ta bira sumamente importante, pa evita pegamento di e cadena y baha e presion riba otro actornan den e cadena di cuido mental manera Stichting Hunto, pero tambe, finalmente, Stichting Respaldo.
“E reto pa cuido di salud mental den e proximo añanan no ta bay ta e parti di medionan, mi ta kere nos lo por crea espacio suficiente pa tin medio pa financia. Pero mescos cu cuido, cuido di salud mental tambe ta bay tin un reto grandi pa haya e profesionalnan pa funciona, pa haci e trabao aki. Y esey ta un esfuerzo cu nos mester keda haci hunto. Tango AZV, Gobierno y e sector di cuido pa nos por keda percura, con nos por innova pa nos sigui haya e profesionalnan ey na Aruba, pa haci e trabao. Ya sea pa via di formacionnan local, ya sea via financia pa formacion den exterior manera nos awo un plan pa specialista pa cu Hospital, pero nos tin cu keda pensa, con nos ta bay stimula nos hobennan tambe pa scoge e carera aki y tambe, naturalmente, percura pa e ta un carera remunera na un manera satisfactorio”, Edwin Jacobs, director di AZV a subraya.
