Aeropuerto di Aruba orguyosamente tabata anfitrion di fanaticonan di aviacion riba “Spotters Day”

ORANJESTAD (AAN): Aruba Airport Authority N.V. (AAA) orguyosamente tabata anfitrion di Spotters Day diasabra ultimo,

treciendo hunto e comunidad di fanatico di aviacion y e fotografonan di Aruba pa celebra nan pasion pa aviacion. 

Cu mas di 70 movecion di avion durante henter dia, e spotters a disfruta di e oportunidad unico pa capta e energia di e operacionnan na Aeropuerto Internacional Reina Beatrix. E evento a trece hunto diferente fotografo apasiona kende nan lensnan ta conta e historia di aviacion na Aruba, resaltando e bunitesa, precision y energia di biahe aereo. 

“Spotters Day/ Dia di Spotters ta nos manera di reconoce e comunidad di aviacion y e fotografonan cu ta trece e magia di aviacion na bida”, asina Marylin Feliciana, Marketing & Communications Manager na Aruba Airport Authority, a comenta. El a continua bisando: “E evento aki ta duna e fanaticonan un oportunidad unico pa ta den e area di operacion, captura nan avion y diseño faborito, conoce e team di AAA y experencia e operacionnan di aeropuerto di cerca. Alabes e ta inspira tambe esnan cu ta iniciando pa explora nan pasion pa aviacion, mientras ta comparti e imagennan impresionante cu ta demostra e energia di nos aeropuerto.” 

E participantenan a disfruta di acceso exclusivo na e areanan di spotting designa, a ricibi articulo conmemorativo y a combersa cu personal di aeropuerto y cu demas coleganan entusiasma durante un dia yena cu pasion y creatividad comparti. 

Aruba Airport Authority ta gradici tur esnan cu a compaña nos den e dia special aki. Boso pasion y creatividad ta contribui na duna bida n’e historia di aviacion di Aruba.