Ganadornan di Gang di Arte 2024 a biaha pa Medellin

Acompaña pa Freddy Tromp y John Freddy Montoya:

ORANJESTAD (AAN) Hibando cu orguyo den nan curazon y carga na man e Bandera di Aruba, nan dushi tera, e ganadornan di Gang di Arte di aña 2024, a biaha diahuebs awo, pa Medellin Colombia, como un estimulo pa nan bunita trabao, actitud, y talento.

   Ta trata aki di e grupo di baile “Super Stars” cu ta consisti di Inonie, Jason, Milliyanne, Niurk y Shante.

   Nan a bay acompaña pa Freddy Tromp y Freddy Montoya, director di Gang di Arte ambos di Departamento di Cultura, y ademas John Freddy como director di Gang di Arte.

Diahuebs mes, cu nan a yega Medellin, despues di acomoda na hotel, nan a disfruta cu un trip pa explora Medellin y conoce un tiki mas di e bunita ciudad aki. Pa 6’or di atardi, tabata tin un opening den “El Centro de Desarollo Cultural Moralia”. Diabierna nan ta participa den un sesion di training y prepara despues pa bishita un area di shopping.

Pa 6.30 or di atardi, nan tin un Seminario di Danza y Concierto na Comfama Medellin, sigui pa un bishita na Paseo Cervantes, cu lo conclui cu un concierto.

Diasabra nan lo participa den un interesante tayer di trabao contemporaneo na Bellas Artes, y cu un presentacion na Courtyards na Paseo Cervantes, pa 6.30 or di atardi, y lo clausura cu un concierto.

Diadomingo e hobennan y nan mentornan lo bin Aruba bek, sigur cu un bagage di conocemento nobo y un bunita experiencia cu lo keda cu nan pa semper. Matutino DIARIO ta desea Gang di Arte hopi exito den e experiencia y aventura educativo aki.