Prome Minister di Aruba Mike Eman:
- Pero habri oportunidad pa sigui traha te na 67 aña
- Si sigui traha despues kizas ta sin impuesto adicional
ORANJESTAD (AAN): Ultimamente, den pueblo ta aumentando e preocupacion tocante si edad di pensioen lo subi. Prome Minister di Aruba, señor Mike Eman, den un entrevista cu DIARIO, a enfatisa cu pa Gobierno di Aruba ta importante cu edad di pensioen keda na 65 aña. El a agrega cu Gobierno ta trahando riba un plan pa permiti esnan cu kier sigui traha te na 67 aña, sin cu esaki resulta den un impuesto adicional.
Segun Prome Minister Eman, tin hopi hende cu no tin e habilidad fisico pa sigui traha despues di 65 aña y tampoco ta haya trabou facilmente mas. Pero esnan cu edad mas cu 65 aña cu kier sigui traha, mester tin e oportunidad aki. Prome Minister a remarca cu Gobierno ta explorando e posibilidadnan pa den enseñansa tambe pa maestronan sigui traha mirando e scarcedad di maestro di scol cu tin.
Pa acomoda e grupo aki, Minister di Finansas Geoffrey Wever ta trahando riba un cambio den e reglanan di impuesto pa pensionadonan aki no haya un impuesto adicional riba e suma adicional cu nan lo haya riba pensioen. Hopi biaha pensionadonan no kier sigui traha pa motibo cu nan lo mester paga mas impuesto adicional. Aruba mester di ciudadanonan cu kier sigui traha y sumanan adicional lo demoralisa pensionadonan pa sigui contribui.
“E cambio cu nos kier haci den impuesto ta cu pensionadonan lo no cay den e bracket di impuesto mas halto. Esaki lo bay yuda hopi pa esnan cu por sigui contribui, keda contribui sin cu nan ta haya nan mes cu un tarifa di impuesto cu e demoralisa nan pero sinti nan mes anima pa sigui contribui”, Prome Minister Mike Eman a duna di conoce.
