Fundacion Contra Cancer di Prostaat ta aconseha tur homber di 50 aña haci checkeo

Milo Croes, presidente:

ORANJESTAD (AAN) – Fundacion Contra Cancer di Prostaat (FCCP) ta cumpliendo diez aña di existencia, aunke el a wordo funda na aña 2012 door di señor Rudy Rodriguez (dfm), y e tabata e prome Presidente. Asina señor Milo Croes, presidente di FCCP a menciona den entrevista cu DIARIO.

            Desde e dia cu el a tuma e cargo di presidente, e fundacion a dicidi cu nan lo sigui cu e mesun campaña cu su antecesor, señor Jurgen, tabata hib’e. Pero el a topa cu algo hopi bunita ora nan a topa e team di 5 cu ta bringa e cancer di prostaat.

            E fundacion su mision ta brinda sosten, guia y ayudo pa fortalece e hende homber, preveni di haya cancer di prostaat. “Pesey, un di nos metanan ta pa yega na comunidad, pa nan haci nan test di prostaat, e PSA, cu aunke nan ta bisa cu no ta indicativo, aki na Aruba el a resulta cu ta e miho forma pa yega na un aproximacion si bo tin of no”, Milo Croes a señala.

            El a indica cu e fundacion ta bisa cu si un persona tin un famia cu tin cancer di prostaat, na su 40 aña e tin cu cuminza check. “Nos di FCCP ta bisa cu na bo 50 aña nos ta recomenda bo pa check pasobra bo por tin e oportunidad di tin’e. Y si bo ta riba 60, practicamente, si bo no haci algo, si no a check, bo tin e chens di tin’e. Esey ta e mensahe cu nos ta manda.

            Mi mes a opera cu 69 aña, mi nunca a sinti algo, mi a bebe un pildora pa prostaat for di mi 40 aña, y djey nan ora mi a ripara algo straño mi a bay mi dokter di cas, ken a haci un chekeo y a manda mi di biaha pa e urologo. Djey nan pa dilanti, nos a bay Colombia y a opera cu e robot cu nan ta yame e “Da Vinci surgical system” locual a sak’e full”, Milo Croes a relata.

            El a subraya cu e ta contento cu na Aruba, awendia, tin e bestraling, na Instituto Medico San Nicolas (ImSan) y e ta un di esnan mas interesante y moderno den e area di Caribe.