Docentenan di Colegio Arubano a bay Croacia pa curso di Erasmus+

Inteligencia Artificial lo yuda educacion

ORANJESTAD (AAN): Den e epoca di avancenan tecnologico, docentenan tey na vanguardia di inovacion, unda cu Inteligencia Artificial (AI) ta hungando un rol transformador.  Mundialmente docentenan ta descubriendo aplicacionnan positivo di AI den educacion, unda e proceso di enseñansa ta wordo mehora y ta adapta na e necesidadnan individual.

   Na Aruba tambe, algun docente di Colegio Arubano a haya chens di participa den e curso ‘Teaching the fun way in a digital era’, cu a ser duna na ciudad di Split na Croacia di 11 te cu 17 di November cu a pasa.  E ta un impulso di e programa di Erasmus+.

   Durante e curso aki, e docentenan a siña usa e ultimo hermentnan di AI cu o ta djis enriquece e materia, sino tambe ta haci lesnan mas facil.

   Ademas di esey, e tecnologianan di enseñansa ta mehora e efectividad di dunamento di les, y ta promove un comprension mas profundo di e materia di les.

   Fuera di esaki, e docentenan a logra di haya contacto cu docentenan di varios pais manera Estonia, Francia, Grecia, etc., unda ya caba nan ta compartiendo ideanan relaciona cu educacion. Di eynan a surgi ideanan nobo cu ta facilmente aplicable pa dunamento di les na Colegio Arubano.

   Tecnologianan moderno di enseñansa ta e clave pa futuro di educacion.  Pesey mes Colegio Arubano ta tumando e paso grandi pa upgrade nan docentenan pa asina nan haci uso na un forma mas sabi di inteligencia artificial.  Hunto nan lo lucha pa un sistema educativo cu no ta djis prepara nan pa e retonan di mundo moderno, pero cu ta bay inspira y motiva e alumnonan.

   E docentenan a indica cu e viahe pa Croacia tabata un experiencia inspirador, educativo, y dibertido.