Fiesta di Luz a cuminsa diasabra

A ilumina Oranjestad:

ORANJESTAD (AAN):  Diasabra 25 di november a cende e luznan di pasco den Oranjestad, asina marcando e comienso oficial pa e temporada di fin di aña. Durante su inicio, minister Geoffrey Wever a hiba su discurso enfocando cu e luznan adicional y decoracionnan di luz tur ta un parti importante den un proyecto mas amplio y e vision total di revitalisacion di Oranjestad.

            Tur diasabra te cu 23 di december lo tin actividad den y rond di Caya G.F. Betico Croes, hunto cu specials y entretenimento musical. Cu cada compra ta sostene empresarionan local, y cada bishita ta contribui na un ambiente positivo y  un centro di ciudad revitalisa.

            Por a presencia palonan di luz cu recientemente a keda instala tambe. Na banda di tin un estilo clasico y elegante, esakinan a visiblemente amplia e claridad den e area. Comerciantenan a indica di ta contento cu esaki, mirando cu e ta fomenta un sentimento di seguridad adicional necesario pa sostene e clima empresarial di e area. Awo cu e decoracionnan di luz, Minister Wever a indica di kier a añadi na e sentimento positivo pa consumidornan, specialmente den e temporada festivo aki.

E proximo eventonan di Fiesta di Luz ta como lo siguiente:

2 december, 4:00 PM – 6:00 PM, entretenimento: Maruba

9 december, 4:00 PM – 6:00 PM, entretenimento: Las Unicas

16 december, 4:00 PM – 6:00 PM, entretenimento: Rumba Caribeña

16 december, 4:00 PM – 6:00 PM, KidsPreneur$ Bazaar @ Plaza Daniel Leo

23 december, 6:00 – 8:00 PM, entretenimento: Maruba

            Minister Geoffrey Wever ta haci un yamada na comunidad henter pa pasa den centro di Oranjestad y pasa unrato ameno den ambiente di pasco y fin di aña.

            Tambe kier a manda un palabra di danki enorme na henter e ekipo di DOW cu a traha incansablemente pa por ‘make it happen’ y den un tempo rapido a instala e luznan nobo, como tambe tur e decoracionnan!