Pader Jose Miguel Nava ta conta e historia:
ORANJESTAD (AAN)—Pader Jose Miguel Nava, ken ta na encargo di IKDA (Instituto Kateketico Dioscesano Aruba), a duna di conoce den un encuentro cu prensa, cu IKDA ta celebrando un fecha special cu ta e bispo di cuminza e tempo di Pasco di Nacemento di Hesus.
El a duna di conoce cu e aña aki ta wordo celebra 800 aña di Pesebre, y e lo wordo celebra na scolnan.
Pa motibo di esaki nan a prepara un serie di actividad y particularmente, nan a yama e proyecto di e tempo aki “Mi curazon ta Bo pesebre”.
Pastor Nava a expresa cu tempo di Pasco ta un tempo pa comparti cu otro, tempo di fiesta, di alegria unda tur hende ta dorna su cas, ta pone tur cos nechi, ta prepara tur cos na un manera masha bunita.
“Pero tin un detaye hopi importante. Cu hopi biaha nos ta lubida e nificacion di Pasco di Nacemento. Y Pasco di Nacemento ta papia di un momento special, e Nacemento di nos Señor Hesus Cristo.
Pesey mi kier probecha y motiva nos pueblo pa e aña aki, particularmente, por desaroya e Pesebre den nos cas, nos oficina, y tur caminda.
Pasobra si nos ta lubida di e nacemento di nos Señor Hesus Cristo, pensa den un ehemplo masha simpel. Bo ta organizando un fiesta bunita; bo yiu ta haci aña, bo ta prepara e cuminda, ta cumpra coi bebe, regalonan, tur cos. Bo a haci e fiesta, pero bo no ta invita bo yiu cu ta haci aña. No tin sentido, mesun cos ta sosode den tempo di Pasco. Si nos no ta invita Hesus, kico nos ta celebra? Pero e aña aki ta un aña special, nos ta celebrando 800 aña di e tradicion di Pesebre”, Pader Nava a menciona.
El a sigui splica cu e tradicion di e pesebre a bin for di man di San Francisco di Asis na aña 1223, na Italia, añanan cu el a muri. “E tabata debil, malo di salud, pero el a sinti un deseo den su curazon di organiza algo special, algo bunita pa celebra tempo di Pasco. Pesey el a dicidi di traha na Grecia un pesebre bibo unda el a cuminza busca hende, pa organiza e pesebre aki, y ora el a presenta e pesebre, Dia di Pasco, e clock di Misa a cuminza sona masha duro den e pueblo di Grecia, tur hende a keda asombra, ningun tabata sa kico ta sosode, y diripiente nan a wak cu den un grot di seroe Francisco tabata haci seña pa hende bay. Y ora nan a wak e pesebre, nan a keda asombra di e buniteza. Nan a sinti den nan curazon e forza di e nacemento di Nos Señor Hesus Cristo”, Pader Nava a conta.
Pa motibo di e celebracion di e 800 aña di e tradicion di pesebre, IKDA ta organizando dos actividad pa e tempo special aki.
