Edgard Vrolijk, Presidente di Parlamento:
ORANJESTAD (AAN) – DIARIO a entrevista Presidente di Parlamento, mr. Edgard Vrolijk, tocante e resultado di eleccion di Tweede Kamer na Hulanda, unda Geert Wilders a gana.
Esey ta loke pueblo a vota p’e y esey ta loke pueblo mester respeta, Vrolijk a expresa, agregando cu el a wak hopi manifestacion pero esey pueblo a pidi y mester respeta e resultado, Presidente di Parlamento a reitera.
“Pa nos no ta problema. Den Reino, mi ta kere cu nos a traha cu tur hende caba y nos tin cu sigui traha cu tur hende pasobra nos tin nos tin nos statuut y e cosnan ‘in place’, y sigur gobernacion ta continuacion. Tur gobierno tin su pensamento, su maneho, pero mester tene cuenta tambe cu e derecho di otro pais, sigur den Reino. Laga nos wak con e ta bay, hopi hende ta zapatea, pero e ta un proceso largo di negociacion cu mester bin dilanti ainda; ultimo gobernacion a dura, segun mi, mas cu un aña pa forma”, Edgard Vrolijk a subraya.
Presidente di Parlamento a expresa cu mester wak con e ta forma, y cu e por bira un reto grandi pasobra si wak e banda drechi, pasobra si no tin e cantidad di asientonan e mester join un links. “E links tampoco no tin suficiente asiento pa forma gobierno na un forma corecto, kiermen e ta bay ta un challenge benta awa den biña tur dia.
“Na moda di bisa, na final di dia bo por ta e partido mas grandi pero pa bo forma gobierno, mester benta hopi awa den biña tambe. Mi ta kere eynan pueblo lo wak e resultado tambe, pues laga nan cana e caminda y respetando e opinion Hulandes pa su gobierno”, Edgard Vrolijk a señala.
Vrolijk a comenta cu Aruba tabata tin hopi combersacion cu PVV, y naturalmente nan tin nan pensamento cu ta semper un poco radical, pero nan sa e situacion di Reino, nan sa cu tur ta patrianan ruman, cu mester respeta statuto y semper nan a hiba dialogonan tremendo, y esey tas e base di relacion entre un cu otro.
“Bo tin bo opinion, mi tin mi opinion pero nos mester por yega na otro y mi’n ta gaña, e relacion cu nos tabata tin ultimo añanan durante IPKO cu esnan di PVV ta hopi bon. Hulandesnan ta uza hopi e continuacion y gobierno por bin, pero afpraaknan haci ta wordo cumpli”, segun Presidente di Parlamento mr.Edgard Vrolijk.
