Festival di Dande 2023 den Centro di Bario Brazil lo bin cu un concepto nobo e aña aki

Dia 27 di December cuminzando pa 6 or di atardi:

ORANJESTAD (AAN) – Den conferencia di prensa cu a tuma lugar den e Centro di Bario Brazil, señor Chico Harms a duna informacion tocante e celebracion di Dande, cu lo tuma lugar dia 27 di December en curso, cuminzando pa 6 or di atardi.

E aña aki ta 53 aña cu e celebracion di Dande ta tuma lugar den e Centro di Bario Brazil. Seguidamente, señora Inky Richardson, presidente, a expresa cu den nomber di Centro di Bario Brazil,  cu ta e cuna di arte y cultura cu ta tuma lugar hunto cu Fundacion Chico Harms, kier a invita pueblo di Aruba en general pa dia 27 di December bin na CBB, pasobra cosnan hopi special ta bay tin, cu Fundacion Chico Harms a pone den otro y cu ta un tiki diferente. Y hunto cu esey CBB ta bay honra y reinaugura nan baluartenan y e anochi ey lo agrega dos mas. Ta bay tin un homenahe chikito prome cu bay pafo, pa hunto cu e famianan y invitadonan pasa un momento hopi alegre pa duna honor na nan baluartenan cu tabata tey, y esnan cu tey ainda.

“Ami semper ta kere den duna honor esnan cu ta na bida y no ora nan bay. Pa e parti aki nos ta bay haci algo special e anochi aki”, señora Richardson a indica. E ceremonia aki ta tuma lugar pa 6’or di atardi pa despues bay pafo pa e show di dande cuminza.

Señora Inke a pasa palabra pa Tito ken a menciona cu nan ta bin e aña aki cu un concepto nobo. Esaki lo encera cu ta bay tin un total di 18 grupo. Despues di e prome 9 gruponan lo tin un obra teatral, na unda lo presenta en bibo con e dande di antes a wordo celebra na Aruba.

“E hendenan cu trahenan di antes, full stage y background di antaño, y tambe e dande con el a wordo canta den temponan di antes. E set up tambe nan nos tin pensa di cambi’e,  haci’e algo mas familiar, e no ta bay ta den forma di teatro cu stul banda di otro sino cu nos ta bay pone un mesa unda hendenan por sinta banda di otro, hende straño por sinta banda di otro, cu nan por combersa y pasa un anochi ameno, mientras nan ta wak e show”. Tito a agrega cu e entrada tambe ta bay ta un sorpresa ora cu e publico yega, con nan ta wordo ricibi ta algo diferente na tur otro lugar cu nan por bishita. Cushina tambe lo bin cu cumindanan di antes. Lo tin diferente stand pa e publico por purba. Lo tin coi dushi tambe di antes manera boyo di maishi rabo y Koekoei. Entrada ta solamente dos florin. Tito a menciona cu e lugar tambe ta bay wordo transforma den forma di antaño.