Exposicion ‘Soul Expresion’ di Lucia Lacle ta habri dialuna

Na Biblioteca

ORANJESTAD (AAN): Biblioteca Nacional Aruba ta invita comunidad pa bishita e exposicion di artista visual Lucia Lacle. Esaki ta habri dialuna awor y lo ta habri te fin di maart 2026.

   Señora Lucia Lacle ta presenta un coleccion di 40 cuadra hopi colorido y expresivo. Titulo di su exposicion solo ta ‘Soul expresion’. Publico por wak cuadra y dibuho pinta cu diferente tipo di material manera acrylic, oil, watercolor y charcoal, cada un ta duna un resultado diferente.

   ‘Soul Expresion’ ta refleha Lucia su desaroyo artistico personal. Tin obra cu paisahe, naturalesa y flor, still life y tambe portraits den diferente estilo/composicion manera realismo y poco abstracto. Otro obra ta expresa emocion, movemento y color. Hunto nan ta mustra su balansa y libertad. Lucia Lacle ta pinta mas cu 40 aña caba. Esaki ta su prome exposicion solo pa publico.

   E exposicion ta habri durante orario regular di biblioteca. Lucia Lacle lo ta presente pa duna un recorido y splicacion, diaranson atardi, dia 11 di maart di 5:00 pm pa 7:00 pm, y tambe Dia di Himno y bandera di 9:00 am pa 11:00 am.